【是但噏】林海峰開騷軟硬合體講香港 Jan:香港人核心價值係「放假」

娛樂 11:46 2019/09/20

分享:

林海峰開騷笑論香港。

林海峰昨晚在紅館舉行《是但噏Happy Monday 2019》首場,阿Jan在今次棟篤笑,用嘻笑怒罵手法談近日香港社會,由以前香港人熱愛炒樓,到今日人人喊「香港加油」,又講到香港人的核心價值之一,就是一定要讓香港人放假。

一連6場《是但噏Happy Monday 2019》昨在紅館開鑼,過去林海峰棟篤笑常講自身、生活及娛樂,不過今次就更多以近月香港現況作題材,更貼合時事。

其中Jan提到香港的核心價值,「香港嘅核心價值除咗自由﹑民主﹑人權﹑法治﹑廉潔之外,最重要係『放假返鄉下』,哩個非常重要,我重複多一次,『香港嘅核心價值,除咗自由﹑民主﹑人權﹑法治﹑廉潔之外,最重要係放假返鄉下』,係唔係呀?」

阿Jan台上笑指,慶幸香港人還有放假放鄉下的自由,假如此核心價值被攻陷,肯定大件事。「唔係講笑,下次畀你去日本,但係只畀你去到日本機場,然後原機折返香港,問你死未?係咪先?再嘈慢慢收窄你,下次只畀你去『激安』,香港嗰間,困你24小時。」

Jan指大家都要捍衛放假自由,令全場爆笑。

(商台提供)

以家庭比喻社會

在棟篤笑上,林海峰以以家庭關係比喻目前香港,Jan笑稱:「每個成功男人背後,總有一個偉大女人,而一個失敗嘅爸爸背後,仲有兩個反眼嘅仔女。」

他形容,作為父親的自己在家中都要多聽子女意見。「我決定下次食飯時,我係飾演waiter(侍應):3位(即妻女)食啲乜嘢,使唔使我介紹吓咁呢?今日我餐廳做緊個非常之特別,小姓林,你可以嗌返我英文名,叫Daddy。」

他指作為一家之主,一定要聆聽屋企聲音:「仔女會話daddy叫我哋食飯時唔可以玩手提電話,你自己食飯時都玩緊手提電話呀﹗『Er...我手頭上冇呢方面資料呀』

Jan又指將來要跟子女展開對話平台,希望讓關係回復和諧。

(取自facebook)

林海峰又在台上,講到以往年青人跟現今年青人分別,Jan說:「我哋呢啲廢中,成日話欠咗年輕人,但永遠係有欠冇還,所以誠信破產,時時講『我哋做過後生,我哋知』,我哋點會知呢其實?那些年拖手,我最多拖兩隻,我依家見啲後生拖手,係拖條鏈出嚟嘅!」

他又笑指當年後生,暑假時是「四大天王」,現在後生是「五大訴求」:「所以唔好再講年輕人係社會未來棟樑,年輕人唔係未來,年輕人係現在呀﹗」

又指以前香港人只講「香港炒熡」,現在則講「香港加油」:「只是以前賺住嗌,而家係蝕住嗌。」

林海峰、葛民輝及黃秋生合唱。(圖片:商台)

軟硬合體

去到尾段時,特別嘉賓葛民輝和黃秋生出場,三人以辦公室角色出場合唱,以歌鼓勵打工仔,就算再辛苦都要努力、奮鬥。

秋生扮演廣東話發音不純正的經理,笑言觀眾今晚「好high」。秋生台上表演吹口琴、葛民輝彈Ukulele,最後合唱陳百強的一曲《疾風》,為香港加油。

《是但噏》金句

「氹人笑難,氹香港人笑難,氹唔開心嘅香港人去笑係難上加難」

「香港嘅核心價值最重要係放假返鄉下」

「以前後生係「四大天王」,現在後生係「五大訴求」!」

「以前講「香港炒樓」,而家講「香港加油」!

「一個失敗嘅爸爸背後,仲有兩個反眼嘅仔女。」

記者:Eric