Super Girls成員蔡明思結婚派嫁女餅　Jessica跟準新郎日本影幸福婚照

Jessica結婚了！Super Girls領唱蔡明思（Jessica）今年4月與拍拖近6年的圈外男友陳冠Steven訂婚，將於10月27號在台北的酒店擺婚宴，邀請親朋好友見證人生另一頁。

▲ （照片由Jessica提供）

距離婚禮還有一個月時間，今日Jessica先向各方親戚好友送上嫁女餅，同時附上一張印有二人於日本拍攝婚紗相的卡﹐卡上還有二人英文名Jessica及Steven的縮寫「JS」的logo。

Jessica透露早前於日本米子市拍攝以大自然為主題的婚紗相，並帶了三套婚紗過去日本，其中見她在沙灘上與準新郎拍攝的一套婚紗，露背及開胸設計非常性感。

▲ （照片由Jessica提供）

她表示︰「拍攝的婚紗男友冇特別畀意見，冇唔畀性感，而且影的婚紗唔係結婚當日嗰套，反而結婚套婚紗都好性感，幾Deep V，我都有問佢如果著呢套ok嗎？可能有長輩比較傳統，未必太鍾意。佢就話著我覺得好的婚紗，唔洗諗咁多，佢話佢乜都ok。」

▲ （照片由Jessica提供）

雖然準新郎對婚紗沒有要求，但Jessica笑言Steven「煩過女人」︰「佢成日都好chok，連攝影師都頂唔順，成日笑佢『得㗎喇，可以出道喇』。因為佢對於自己影的相好有要求，當攝影師只係影緊我，佢就不斷在旁邊擺甫士，攝影師見到就唔好意思唔理佢，走埋去同佢影幾張相。」

▲ （照片由Jessica提供）

Jessica透露準新郎比自己更緊張拍攝效果，令她疲累到不想拍攝︰「佢有好多idea，畀好多參考圖攝影師睇，不過佢就樂在其中，比女仔要求更多。雖然今次係幾好玩，不過因為佢好多要求，影到我好累，我同佢講唔好再影，佢就會話『我人生得一次，你好好配合我啦』，反而係男仔咁同女仔講，都幾好笑！」