【駐顏有術】曾智華爆「金刀梁」梁智鴻的怪習慣

健康 16:29 2019/10/14

分享:

梁智鴻已年屆80歲。曾智華在專欄中提到,金刀梁曾指自己只飲水喉水。

梁智鴻醫生近日好「紅」,因通街派的《駿步人生》選咗佢做主題人物,深度介紹呢位八十歲公職大王(曾任立法局及立法會議員、醫學會會長、醫管局主席、安老事務委員會主席、行政會議成員、香港大學校委會主席、廉政公署投訴委員會主席、標準工時委員會主席、現任愛滋病基金會主席及香港防癌會會長),仍孜孜不倦為香港拼搏的人生哲學,真要向佢起立敬禮。

呢位形象鮮明人物(頭髮中間分界、日日三件頭西裝、插袋巾),多年來接受過N次訪問,故家傳戶曉。

梁智鴻醫生能「捱」幾十年仍日日笑笑口,又健康又快樂,因佢「做得又玩得」,充滿「香港仔精神」。

行醫及主持會議時,權威到爆,唧都唔笑。但其他時間,可以極幽默,又願意扮鬼扮馬與任何階層人士打成一片,毫無架子。

例如,七年前參加HKU Barn Dance之夜。嘩,七十二歲人,犀利!帶假髮,着Deep V閃光藍色恤衫,緊身大白色大喇叭褲,再加粗金鏈戴黑超,孭埋個結他扮貓王。對比平時形象,真真笑死人無命賠!

八十年代尾,小弟到佢醫務所傾偈,講吓講吓,講到佢點解長年無病痛。竅門之一,真搞笑:「阿碌,我只飲水喉水,從不煲水。」

「吓?咁都得?唔怕污染咩?」

「香港水塘水好乾淨,清潔又衞生。我飲咗多年喇,無事又健康。你都試吓啦!」

小弟有無試?當然無。今天回想梁醫生當日的「怪習慣」,不知是否仍堅持呢?

全文刊於《經濟日報》,原題為「梁智鴻的怪習慣」