【進擊上車】假如按揭年期延長至40年　進擊的港媽9成按揭上車做業主

買樓難恐怕是香港最難解決民生問題，特首在《施政報告中》提出放寬首次置業的按揭成數，以600萬的上車盤為例，按揭成數將由現時6成放寬到9成，首期只需60萬，同時更調低壓力測試綫，只要供款與入息比率不多於50%，仍然有機會申請按揭。

放寬按揭成數消息一出，嫻姐嘅辦公室嘈到拆天，同事不是反應兩極，而是三極。最近正在放盤的「包租婆」最興奮，即刻打畀地產經紀要封盤加價，放寬按揭成數，無疑會吸引買家入市，首期畀少，入門檻降低，業主睇好後市，封盤加價無可厚非。

職場初哥小妹也加入戰團，爆粗鄙視政策解決不到樓價高企的問題，「就算我靠父幹，畀得起首期，都供唔起樓啦，借9成還到何年何月何日？我都是學劉生話齋，繼續去多幾次日本！」嗯！樓價高企，呢個問題真係好似婆媳關係，錯綜複雜的千古難題！

嫻姐托賴早幾年上車自住，現時每月供款平過租金，目前總算有個安樂窩。嫻姐認同李超人的上車金句「幾時買樓自住都得，但若是博一博炒樓就不好。」買樓前提是計好自己的供款能力，冇咁大個頭就唔好帶咁大頂帽，月入1萬按揭9成走去供500萬單位，你肯供銀行都未必肯借！

計下條數先，以600萬的淘大花園，首期60萬，以年利率2.375，供款30年計算，每月供款接近2.1萬。上車門檻降低，供款金額相應大增，呢條數學題讀過中學都應該識計。

地產代理就有聲音，建議政府既然放寬按揭成數，同步放寬貸款年期30年至40年，協助首置人士紓緩供款壓力。再以600萬的淘大花園，首期60萬，以年利率2.375，若供款年期延長至40年，每月供款則減至1.7萬元，同現時租金相差無幾。

供樓供40年，可能會有人說30歲買樓，70歲供完，真的供樓供到死，還是那句話，貸款買樓如信用卡購物，「借定唔借，還得到先好借！」

嫻姐好傳統，假如真的同步放寬按揭年期至40年，是時候考慮以老公個名，買多個單位畀阿仔做老婆本，年輕人靠自己點上車？我們供唔完點算？留畀阿仔以後自己話事啦！