【校長心聲】小校舍無阻學生發展 保良局林文燦英文小學校長︰學校像舞台助師生圓夢

親子 13:09 2019/10/30

分享:

保良局林文燦英文小學校長文詩詠(左三)認為,學校就像大舞台幫助師生圓夢。(陳偉能攝)

家長揀小學,尤其去睇直資、私立時,都會相當關注校舍、設施,甚至會因為學校禮堂不夠宏偉而覺得學校質素低。家長用這些硬件水平,問我學校質素時,我都會忍住唔翻眼,然後咁答,茶餐廳都會話裡面有卡位,但到底座位重要定食物重要呢?

我幾經常提醒家長,硬件重要,但只係一個次要因素,學校的關鍵是教育。記憶一下我那年代小時候,大部分學校都係所謂火柴盒的狹小校舍,球場是借用公眾的籃球場,籃球架那兩條柱又係足球的龍門,學校一樣出到港隊代表。當然今天要求的標準已完全不同,有優質硬件加上老師培育,一定如虎添翼,但我始終認為,能否成功培訓學生,是事在人為,不應一味歸究各種局限。有位校長朋友就話:「能夠喺有限嘅資源做無限嘅工作,這才是擁有魔法的教育工作者。」

我去參觀過一間英文小學,坦白講,那初小校舍的確很細,因為是接手一間收生不足的舊校,只有一個不合標準的球場,由課室大樓包圍住,好似72家房客。不過一入到學校,就會覺得好豐富,而且充滿生氣。學校講得出及講唔出的活動都有,除一般球類,仲有輪滑、冰球、花式跳繩、武術、速度輪滑、體操等,呢位校長話:「我們不會因為校舍環境細小就局限了孩子的發展。」她認為,課外活動是教育很重要的一環。「學生在『玩』的同時,亦在學習自控,例如時間管理、自理能力等,而不同的活動,除了可讓更多學生參與外,更可發掘學生不同的長處。」

佢就係保良局林文燦英文小學,校長文詩詠說:「我覺得學校就像個大舞台,老師也好,同學也好,都應該幫助他們圓夢!」

香港電台第一台《我們不是怪獸》「梁永樂-怪獸爸爸and friends」,周日晚10點新聞後播出。

撰文 : 梁永樂 八爪魚爸爸