【濕疹湯水】秋冬乾燥幼兒濕疹易發作 養血袪風湯水紓緩痕癢

親子 16:58 2019/11/08

分享:

中醫推介祛風止痕湯水紓緩濕疹症狀。

一到轉天氣日子, 有濕疹的小朋友就會「周身痕」,父母都會出盡法寶,盡量幫他們舒緩痕癢,不斷搽保濕霜,嚴重的還要不停看醫生,很難斷尾,試用食療也是其中一個好方法!

註冊中醫師黃志達指出,因溫度同濕度轉變,轉季時濕疹容易發作。小朋友肌膚又特別敏感,一發作就會現紅疹,一抓就有機會發炎流膿,日抓夜抓亦會影響睡眠質素,令到健康變差,濕疹情況就更嚴重,形成惡性循環。

從中醫角度而言,濕疹有機會醫斷尾,只要改善體質同飲食習慣就有較大機會好番。首先,患者要先知道自己的體質,如果夏天進入秋冬,就是寒濕困阻肺脾,並容易夾有假熱症狀,有機會需要配合生薑、陳皮、片糖水化解假熱症狀;如果秋冬進入春夏,就是寒濕比較單一,無夾雜假熱症狀居多。

總括而言,所有濕疹患者應避免食牛肉、牛奶、奶類製品,如芝士、含有人造色素食物等。寒濕患者忌食:香蕉、西瓜、雪梨、橙、烚菜。

註冊中醫師提醒,小朋友6個月大已經可以服用中藥,不過家長要比較有耐性,用中藥治療濕疹時間會比較長。

以下一款湯水,有助小朋友舒緩濕疹:

養血治濕疹湯

【功效】

適合寒濕而又血虛腎虛嘅濕疹小朋友飲用,有助養血袪風、補腎止痕。

【材料】

烏雞 1/4隻

烏豆衣 1.5錢

雞血藤 2錢

陳皮 1錢

片糖 1/3磚

路路通 1.5錢

荊芥 1錢

防風 1錢

生薑 4片

【方法】

1. 先將雞脾、翼同胸肉起出斬件,加入調味料後備用 。

2. 餘下部份雞殼(頭、頸、背、腳)斬件,再用油爆香雞殼。

3. 將藥材、雞殼同6碗水放入煲內用慢火煲1小時,隔除湯渣。

4. 將已斬件嘅雞脾、翼同胸肉放入湯內慢火滾15分鐘,調味後即成。

文章獲「Dr Eason - 醫神BB Facebook 專頁」授權轉載。