讀書叻不等於做事好 黃元山:多一把尺多一批好學生
發布時間: 2019/11/18 16:56
最後更新: 2020/05/18 12:17
▲ 團結香港基金副總幹事黃元山。
由細到大,每年當公開試放榜時,覺得最奇怪的一句是「成績不要緊,當過去左,回頭看只係一件好小事」,呢句「語言偽術」深深印響我腦海裡面,每次考試後都用這句安慰自己及阿媽,但可能用得太多,效果麻麻地。
到自己做教育記者,訪問會考生先至明白呢句說話的真正意義,因為當時有一成考生,包括自修生係「零分」,不符合升讀中六的就更加大量。
一句「成績不緊要」原來係解,只要你升唔到中六,零分同一分兩分都分別不大,社會上好似有個既定假設,讀書都係為左升班。
或者你會說,嘩,現今世代,仲邊有這個想法咁落後,講多元智能都講左幾廿年啦,又話唔好考下條魚爬樹,因為人人的專長不同,又話各自發揮。我都幾肯定,今天教育體制下,仍然是唯有讀書高,公開試決定前途,至少絕大部分家長仍然是這想法。
每年公開試放榜,就製造大量失敗者,同一時間我地糟蹋大量人才,只不過呢批人才不是讀中英數叻的人,佢地可能係機械、畫畫、創意、發明,或者一類得把口,口才好叻的學生,我們的社會不單俾好少機會給這班人發揮,而且不斷打沉及懲罰佢地。
我剛聽完一個機構完成研究報告,如何推動職業教育,簡單而言就係培育多元人才,研究負責人引述一句說話「多一把衡量的尺,就多一批好學生。」我相當認同,如果學科以外的尺足夠,香港真係人才濟濟,而且不少都是世界級。呢位研究負責人是團結香港基金副總幹事黃元山,佢亦反問,「要做人生勝利組,除了摘星別無他法嗎?」
踏足社會的人,或許都感受過,讀書叻不等於做事好,不如大家一齊諗下辦法,點去幫呢一批非主流教育以外的精英啦。
香港電台第一台《我們不是怪獸》「梁永樂-怪獸爸爸and friends」,周日晚10點新聞後播出。
撰文 : 梁永樂 八爪魚爸爸