做人要識得睇別人眉頭眼額 鄭丹瑞:不是睇人面色而是觀人於微

休閒 19:00 2019/12/12

分享:

鄭丹瑞認為,睇人眉頭眼額是觀人於微。

長輩教落:「做人要識得睇別人眉頭眼額。」這是一個在我初出道時,完全掌握不到、覺得根本沒有需要的人生哲理。「點解要睇人面色?點解唔係佢睇我面色?」這是我踏入社會做事後,覺得最深深不忿的事。

碰過壁、撞過板後,長輩笑我:「你誤會咗,我要你睇別人眉頭眼額嘅意思,係叫你觀人於微,而唔係睇人面色,兩者係有分別嘅。當你見到對方頻頻睇手錶、成日覆電話,心不在焉,唔通你仲打算將你想拍電影嘅古仔,花兩個鐘頭去講俾佢聽咩?佢根本就聽唔入耳!識得睇人眉頭眼額嘅話,就會即刻變陣,同佢再約過一日傾,又或者將準備講兩個鐘頭嘅內容,濃縮成一分鐘打動對方。」

經過長輩提點、經過不少撞板經歷,終於學懂如何去「睇別人的眉頭眼額」。說穿了,就是在「對的timing,做對的事。」

「我培訓自己公司啲推銷員,都係最緊要教佢哋點樣睇人眉頭眼額。」好事之徒口才比我好百倍,訓練過不少出色的推銷員:「試過有同事喺個客屋企有白事嘅時候推銷產品,注定失敗收場。佢走嚟問我:『無理由先走去問人最近你屋企人有無咩事?然後我才開始推銷吧!佢唔講,我又點知?』呢個時候,應該留心對方嘅語氣、觀察對方嘅情緒,才決定用乜嘢方法推銷,識得睇人眉頭眼額,就能發揮最大作用嘞!」

撰文 : 鄭丹瑞