必試不脫色唇膏

09:59 2019/12/04

分享:

近呢一兩年,好興「不脫色唇膏」,就算屋企已經有無數枝唇膏,但當我聽到不脫色唇膏嘅時候,點都會心郁郁想試。

首先講下何謂不脫色唇膏先,故明思義,即係持久度超高,可以做到完全鎖色,就算點都唔會脫色啦!

咁到底不脫色唇膏有咩好呢?就我自己而言,唇膏係我除咗眼線以外,一定會用嘅化妝品。因為如果唇色倉白,個人睇落去會好無精神;所以就算完全無化妝,素顏嘅時候搽返少少唇膏,都即刻起死回生,望落個人有返血色,精神好多。所以我呢啲,長期望落去都好似唔夠瞓嘅人,係一定一定一定會搽唇膏提升返個人嘅精神度。

咁到底不脫色唇膏有咩好呢?最大賣點一定係方便!因為可以唔洗成日補妝,特別係返工嘅時候,平時坐office,飲啖水又無咗啲唇膏,食完飯抹個嘴又無哂啲唇膏,呻個鼻又會抹走啲唇膏,一日都唔知要補幾多次妝。但不脫色唇膏就可以減少補妝嘅次數,方便好多!

不過,有好就自然都會有唔好,唔好處就係會比較難落妝,準確啲講係比較難落得乾淨,因為不脫色唇膏有機會會滲入嘴唇嘅唇紋間,所以會較難落妝。雖然係咁,但我都會繼續用不脫色唇膏,因為真係太方便,有時真係成日都可以唔洗補妝。

不過用不脫色唇膏同平時啲唇膏有一樣最大嘅分別,就係不脫色唇膏一般都會比較乾,搽完上嘴之後,因為通常不脫色唇膏都含有高揮發性嘅矽油,所以一搽完會好快變得乾燥鎖色。

我最近比較常用嘅係Chanel Rouge Double Intensite同埋MAYBELLINE Super Stay Matte Ink呢兩枝唇膏。

Chanel呢枝最好就係可以解決搽完嘴唇會好乾嘅問題,因為呢枝一邊係唇膏,另一邊係精華,可以做到鎖色嘅同時補水。

至於MAYBELLINE 呢枝,雖然佢搽完嘴唇會有好輕微黏黏地嘅感覺,但比起一般嘅不脫色唇膏,算係唔錯,加上性價平較高,一枝Chanel 可以買到兩三枝MAYBELLINE,所以如果抵用黎講,MAYBELLINE 呢枝都係唔錯嘅選擇。