隨隨便便就衝口而出 鄭丹瑞:說話要有分寸

休閒 11:14 2020/01/07

分享:

教說話的技巧,學員最常問的問題是:「點解我唔可以暢所欲言,講我心入面想講嘅說話?一句不留,一字不改!點解講說話要有分寸,要諗過度過?咁做有違我做人嘅原則。」

「你當然可以不加修飾、當然可以衝口而出,這是你想表達你心中所思所想的自由。」我回答。但你的暢所欲言,不等於對方就可以全盤接受。

我記得智者曾經講過:「其實你攞企喺台上講棟篤笑嘅表演者做例子,就最好啦!佢哋每講一句說話,都要考慮現場觀眾會點樣接收?會點樣反應?會唔會有冷場?會唔會講多咗?會唔會少咗?」

「但係佢收好貴一張飛,要令現場觀眾覺得滿意,佢一定要度到最滿意為止,點同我就咁同朋友、上司、下屬、屋企人講嘢啫?」我挑戰智者。

「殊途同歸啫!」智者笑着回答:「除咗台上表演者可以賺到真金白銀外,你同佢要求對方留心聽你講嘅每一句說話、同意你講嘅每一句說話,俾你嘅說話內容帶住佢走,並無分別,所以,你必須每一句都要諗過度過、每一句都要有分寸。如果你想佢同意你講嘅內容,你必須站在對方嘅立場去聽番自己講嘅說話,你去諗對方聽咗你講嘅說話後嘅感受,咁已經唔可以隨隨便便就衝口而出,有嗰句講嗰句,你講咗出嚟,對方唔信服,講咗等於無講,又有咩作用呢?講說話有分寸,同做人有無原則,完全無關。」

撰文 : 鄭丹瑞