【考試成績】考第二好過考第一 鄭丹瑞專欄:讀唔到書唔等於做唔到人

親子 13:42 2020/01/15

分享:

損友吹水大會上,大家拿出自己當年讀書的成績表,懷緬一番。有人年年名列前茅,考第一;有人無心向學,留班收場。

「我呢一生人,從未試過考試名次高過三十名,所以我真係唔知道考第一係乜嘢感受?」損友甲正是那個讀書留過班的學生:「留班對我完全起唔到作用,我唔會因為重讀多一年,成績就會好啲,結果留班嗰年,我考全班包尾。但係咁又如何?我咪又係一樣堂堂正正做咗幾十年人,雖然未至於蓋棺定論,但係我嘅經驗就係,讀唔到書唔等於做唔到人。」

輪到好事之徒分享他的成績表:「我雖然從未考過第一,但我永遠係班上頭五名之內,而且多數都係考第二,所以成日俾老師笑我係千年老二,今日我夠膽蓋棺定論,考第二好過考第一。」好事之徒用挑釁的眼神望住損友乙,因為損友乙正是哪個年年考第一的資優學生。

我讀書成績比較平庸,多數時間徘徊在中游,所以,既不明白考第一有幾風光,但又不至於做包尾大幡,更加不能理解好事之徒對於考第二的驕傲。

「考第一好孤獨,前面無人,成日要擰轉頭望,後面有成班人追住佢,你話幾大壓力!考第二就唔同,只要望住前面,不停俾壓力前面嗰個,成為做好自己嘅動力。仲有,你年年考第一,只要有一年你考第二,已經叫做退步!」有時,好事之徒的歪理,很難駁斥。

撰文 : 鄭丹瑞