【武漢肺炎】駱胤鳴提醒別搶口罩要關懷弱勢　撰長文呼籲：自救並不自私

武漢肺炎繼續肆虐，人心惶惶，香港市內更有不少搶口罩並引起罵戰的事件。SIS樂印姊妹成員駱胤鳴在個人社交平台撰長文，呼籲大眾如果有足夠的用量便不要搶口罩，不用將所有貨買清光。

駱胤鳴並稱大家要學習台灣人的自律，杜絕黃牛黨以及多關懷社區上的弱勢人士。

駱胤鳴於社交平台上貼出戴上口罩的自拍照，並以「自救並不自私」為題撰長文分享自己的看法。

▲ （ 駱胤鳴IG圖片）

她寫道：「本身好想安守本份只談風月經營好IG就算，但見好多人講咩恨比病毒可怕，我都忍不住搖頭嘆氣，大佬呀，有無搭過飛機搭過船，有無聽到廣播，有無聽過要先幫自己戴好氧氣罩、救身衣，才幫小孩穿戴？喂，果陣時你唔覺得自己自私？你唔恨個廣播？你唔投訴？因為大家都知道一個好很簡單的道理，要救人，得先自救。」

駱胤鳴反問大家：「你連自己都保護不了，如何去保護別人？」

她並謂：「但我不是叫大家自私，只是自私有時候並不可恥，先保護好自己，對得住家人，有餘力才去救其他人，也是很合理的事。我們不需要死後被歌頌無私、偉大，我們需要的是溫熱的一家團聚。在疾病和病毒面前我們相當渺小，但愈黑暗的地方愈能發現光明。每人只需要燃點自己一根火柴，我們便能聚沙成塔，成為一團溫熱的火焰。」

▲ （ 駱胤鳴IG圖片）

她續指：

好，講完人哋，講返自己。我講嘅自救不自私，並不是歌頌自私，所以香港人麻煩你哋俾返啲質素，唔好搶口罩，你買夠自己需要嘅用量就好，唔洗買曬㗎！

好多老人家唔係唔想用口罩，係買唔到！太貴買唔起！買唔到真口罩只能賣假口罩。

唔好憎唔好恨，點解會有黃牛黨？因為有人賣唔到飛要買黃牛飛。

點樣杜絕？學下台灣人，台灣人好自律，唔買黃牛飛，等黃牛黨蝕到爆，自然就杜絕得到。

假口罩都一樣，大家關懷一下社區嘅老人家、弱勢人士，佢哋唔識上網買、跨國買，留返啲口罩俾佢哋，真正做得到社區自救，真係要靠香港自己加加油！

最後，她提醒大家：「係呀，呢啲先係真正嘅大愛。唔係拍條片就叫愛咗。#我已經好客氣 #好冷靜 #要行動㗎啦 #子華神話 #愛呀做啦 #企定定無用㗎 #唔好踢一踢郁一郁 #我啲口罩夠用兩星期 #少啲出門 #留喺屋企 #祝大家早日打贏場仗」