【職場哲學】「你問過老細未?」 鄭丹瑞專欄:一個決定不合心水即收旗

休閒 17:54 2020/05/28

分享:

當年做管理層,老細指着我當眾公布:「以後由佢揸旗。」我受寵若驚,努力工作回報老細知遇之恩。頻頻開會,希望公司業務可以更上一層樓。開會時,當然由我揸旗,而老細一早去了打高爾夫。但每次我提出一些改革意見時,身邊的同事,尤其是已經跟隨老細多年的老臣子,總會淡定地問我:「幾好呀,你嘅意見唔錯呀,不過,你問過老細未?」

恕我當年入世未深,聽不懂他們的弦外之音,更衝口而出:「點解我要問老細?我咪老細囉!」然後,我見到這幾位老臣子面露不屑之情,對我嗤之以鼻。有一次,大家爭拗得面紅耳熱時,我忍不住再三強調:「老細親口講過,以後係我揸旗,即係話我可以決定公司所有嘅嘢,點解你哋仲要我問過老細呢?」

由於我措詞很不客氣,老臣子也就不再轉彎抹角跟我兜圈子,其中一位清一清喉嚨跟我說:「老細話俾你揸旗,你就信以為真呀?你真係以為老細從此歸隱田園、不問世事?你實在太天真。你睇住嚟,只要你有一個決定唔啱佢心水,我保證佢會即刻掉低枝高爾夫球棍,返嚟坐番你個位,揸番佢話俾咗你嘅嗰枝旗。」

老臣子是智者,更是一位偉大的預言家,因為不出三個月,當老細厭倦了遊山玩水的退休生活,也就是我交還揸旗儀式的時候。

TOPfit 推出食物資料庫,搜羅本地多間餐廳及逾千款食物營養標籤,立即查看:http://bit.ly/2UJP4dx

訂閱Telegram最新🍴✈️🎁優惠及送禮情報:http://bit.ly/3bebLM2

撰文 : 鄭丹瑞