李幸倪挑戰湊仔精神消耗大　Gin Lee感受到為人母親不簡單

李幸倪（Gin Lee）為配合年度首支派台歌曲《敢》的主題，近期先後接受多項挑戰，繼踩Roller、學紋身後，日前又再挑戰「敢」湊仔！今次Gin要化身保母湊B「過三關」，包括餵BB食蛋糕、換尿片及剪頭髮，自言很久沒有湊BB的Gin果然雞手鴨腳，即使法寶盡出，BB依然喊聲不絕，難怪Gin事後高呼「湊仔好攰」，日後一旦有B必會全職媽媽！

在接受「敢」湊仔挑戰前，Gin大叫心情緊張，她說：「其實我好鍾意小朋友，不過好耐未湊過，未知表現如何？」

當「主角」BB甫出場時，Gin表現興奮，不過BB面對陌生的Gin似乎不太受落，頻頻擰歪面，又放聲狂喊，Gin不斷出招，又唱兒歌、又扮鬼臉，直至使出自創的「雀仔攻略」即見成效，將BB「融化」拉近距離，她說：「BB一扭計，我就抱他去睇雀仔，因為好多小朋友都鍾意睇一些郁的東西，例如巴士、車、雀仔，所以這招『雀仔攻略』是成功的。」

▲ Gin Lee用「雀仔攻略」拉近與BB的距離。

餵B食蛋糕變食檸檬

縱使成功同BB拉近距離，但Gin在餵食物時竟然「食檸檬」，BB頻頻擰歪面不理會Gin，最終一啖食物都沒有放進口。

Gin說：「我以為餵小朋友食嘢會最容易，因為好多小朋友都好饞嘴，結果原來係最難，BB一啖都冇食，反而仔餵了我食一啖。」

▲ 要為BB換尿片，令Gin Lee被考起。

去到換尿片環節，當Gin為BB除褲即傳來BB嚎哭聲，頓令Gin顯得手忙腳亂，她說：「這個（指條尿片）究竟是如何除？」最後使出渾身解數，勉強成功為BB換片，但Gin笑言「換片換到出晒汗」。

最後，在剪髮環節，手執剪刀的Gin，竟順利地為BB修髮，就連Gin都難以置信表示：「比預期中順利，可能佢好專心玩佢嘅嘢，我可以好快就剪到。」

完成湊BB挑戰後，Gin直言在眾多的挑戰中，今次是最難的一項：「精神好攰，要諗好多計先可以氹到BB；如果我將來要湊小朋友，一定需要Full Time（全職），因為又要工作，又要湊小朋友，體力上好難應付到。」體驗過一日的湊仔，也令Gin不禁大讚天下母親的偉大。