【飛虎之雷霆極戰】黃宗澤公開三大擇偶條件 Bosco:有緋聞不能小器

娛樂 15:25 2020/06/22

分享:

專欄作家曾智華分享黃宗澤的擇偶條件。

講緊邊個咁離地?現今TVB當紅「男一」黃宗澤(Bosco)是也。

佢套《飛虎之雷霆激戰》收視好勁,又正踏入人生黃金期,大把女人撲埋身,所以,可以好風騷咁講自己「擇偶條件」。

四十歲男人,今個世代來講,無論在體能或事業,應該食正起飛期,加上外形俊朗,真係唔憂無女朋友,反之,是怕太多黐身啫,正常!

我肥碌N年來,見盡無數當時得令男明星歌星球星,最紅時,真的是魅力沒法擋,吸引死異性。

不過,你知我知個個知,呢類傾慕式感情,如霧似煙,完全無根基。當明星唔紅又或衰老後,班「傾慕」你的異性,當然頭也不回轉軚另找其他「獵物」。

黃宗澤被視為TVB筍盤男神。(經濟日報圖片)

黃宗澤所公開的「擇偶條件」,非常「離地」,話明自己:一、重友輕色,兄弟至上,女朋友絕對唔可以黐身;二、女朋友唔可以要求佢報告行蹤;三、女方要唔計較,就算自己有緋聞都不可以小器妒忌。

睇完以上三大擇偶條件,我肥碌即時咔咔聲大笑,佢真正發白日夢。

究竟普天下有無愛你、願意同你長相廝守,甚或做你老婆的女人,會心甘情願接受以上三大條件的呢?

哈哈哈,有的話,你真要懷疑佢「是否女人」!又或,是否真心愛你?因為,世界上的「正常女友」及「正常老婆」,絕不可能係咁㗎喎!

黃宗澤若發現有,請通知我肥碌,即時向佢請益,封為偶像,再叫齊全世界老公來觀摩可也。

全文刊於 經濟日報 【原題為《離地擇偶條件》】

撰文 : 曾智華