【佳節思親】單親媽日做兩份工養家捱到病 兒子憶母端午病逝想念媽媽糭味道

親子 19:08 2020/06/26

分享:

有單親媽媽日做兩份工養大兒子,結果捱到病,兒子憶母親端午病逝,更想念媽媽糭的味道。

每年媽咪都整好多糭,真係端午食到中秋,有段日子食到懷疑人生,不過我有位朋友偏偏反其道而行,每到端午前後一定問:「Auntie有冇包糭呀?可唔可以留兩三隻畀我?」

得得得,我畀夠10隻你!

某年端午節食完飯,我媽咪塞咗兩大袋糭畀我,由於一早答應同呢位朋友夜啲出去飲嘢,所以我千萬個唔願意咁拎住兩袋糭出去。

「蘭桂芳?」

我:「唔喇!柒呀!荃灣吖,楊屋道有啲bar冇乜人㗎!」

結果兩條友喺荃灣楊屋道酒吧飲嘢,開頭好地地,後來佢飲多兩杯就開始失控:「好掛住媽媽。」

講講下,男人老狗竟然喊咗。

面對兩袋糭,仲有一個喊到收唔到聲嘅男人,我再次慶幸冇出去蘭桂芳。

我朋友好細個已經冇咗爸爸,所以佢媽媽長期做兩份工養大佢,一份係快餐店洗碗,一份係嗰啲洗衣工場,都係時薪形式,總之佢媽媽係keep住每日做十幾個鐘。

兩母子有輪公屋,但你知香港啲公屋係輪好耐,所以佢哋有段時間住過家維邨對面嗰啲舊樓劏房。據佢所講,劏房環境已經比細個嗰陣好好多,兩母子最惡劣試過住一啲類似籠屋板間房嘅地方,有道友會無啦啦瞓喺條走廊,每日又會見到啲「鄰居」因為爭共用嘅廚房同廁所而嘈交,總之問題天天都多。

住嘅地方同當時讀嘅小學有一段距離,經濟條件又唔好,所以佢冇坐任何保姆車或者交通工具,佢媽媽每朝都會陪佢行好遠嘅路返學校,細細個唔識咁多嘢,會羨慕人哋一放學就喺門口上保姆車,佢曾經問過媽媽:「點解我冇得坐車嘅?」

佢記得媽媽答:「我哋行路咪仲開心,可以睇好多風景。」

後來漸漸長大,佢意識到自己同其他小朋友嘅屋企環境有好大分別,印象最深刻一次係啱啱升F.1,住得近屋企嘅同學會返屋企食飯,住得遠嘅就會成班人去附近茶餐廳食,而佢雖然住得遠,不過冇錢去茶記,只會喺屋企拎啲白麵包返學,再坐喺公園長凳自己食,咁始終F.1嘅小朋友仲係好細個,有一位同學真係笑佢連飯盒都冇錢食,難得嘅係我朋友完全唔在意,佢只著眼於每日見住媽媽做十幾個鐘,一年365日都冇休息,明明病緊都照捱,所以佢答應自己要努力讀書,賺錢養阿媽。

我朋友F.3已經識得喺惠康貼張紙幫人補習,唔知有冇人記得,以前惠康係有個notice board畀人任貼廣告,最多人貼就係幫人補習嘅廣告,好多中學生大學生都會喺嗰度貼張紙搵學生,咁佢起碼唔使問媽媽拎零用錢,讀到預科同大學嗰陣,佢更加搵埋part time做,後來終於輪到公屋喇,只係媽媽享受到嘅時間並唔多,因為當時媽媽有病,身體好瘦好弱。

佢出嚟社會第一份工係做一間搞event搞talk嘅公司,經常性要飛,不過人工算好好,有次佢出trip去完日本買咗啲草餅返嚟,媽媽勁鍾意食,仲不停問︰「日本係點㗎?係咪好靚㗎?」

「好靚好乾淨㗎!我請你去日本旅行好冇?」

佢記得媽媽當時好開心,猛咁話自己大鄉里,成世人冇坐過飛機,唔知會唔會好驚,但又好想個仔帶佢去見識下。

好可惜,等唔到。

佢媽媽走嗰日係端午節,佢記得公司當年有組隊玩龍舟活動,但由於媽媽嗰幾日身體狀況好差,所以佢冇出席,幸好公司同事全部體諒同埋support。

識咗佢之後,呢條友每年端午都搵我出嚟飲嘢,佢怕自己屈喺屋企會好掛住媽媽。

當年佢喺酒吧崩潰,我將一袋糭畀咗佢:「咪喊啦,我阿媽叫我畀你㗎,媽媽糭,畀唔畀面先?」

我朋友成袋拎咗返屋企,即晚就打返畀我:「食完你阿媽啲糭,我更加掛住自己媽媽,當年上咗公屋之後,媽媽有一年都包過糭,雖然入面啲料唔名貴,不過好好食,食你阿媽啲糭就諗起當年嘅味道,我好想請媽媽去日本,由細到大佢都好辛苦,自己唔食都畀我食,捱到好多病痛……」

其實當年嗰袋糭,我媽咪唔係畀佢,純粹我亂作,只係想有人分擔下,順便安撫下佢情緒,估唔到之後每一年,呢位朋友都追住要食我阿媽包嘅糭。

佢而家事業有成,結埋婚做埋老豆,端午節唔會再搵我出去飲嘢喇,但有一樣嘢始終風雨不改,就係拎我阿媽啲糭,頭先仲特登揸車入嚟屯門問我拎。

「你媽媽啲糭嘅感覺同味道,出面真係買唔到。」

好啦!我喺自己屋企隔空陪佢食啦!

文章獲「辦公室日報」授權轉載。

更多家庭關係的報道︰

【只想為你】單親媽日打3份工供養女兒到英美升學 「陳師奶」憶體罰打女感內疚:我好失敗

【超級媽媽】歷家暴捱窮日打5份工養大3孩 單親媽媽培育子女成Tesla億萬企業家

【相依為命】帶腦麻痺兒跑馬拉松環島遊 單親媽與死神競賽︰多讓他看世界不留遺憾

TOPick新聞編輯部製作電子書《食用安全手冊》,提供自家檢測報告,包括雞蛋、搓手液、兒童口罩等,更有牛奶、清潔用品等食安檢測報告【按此免費下載食用安全手冊】

TOPick推出小學各級工作紙,參考名校精選試題,鞏固知識,緊貼學習進度。立即免費下載︰bit.ly/2X96KAZ

訂閱Telegram最新🍴✈️🎁優惠及送禮情報:bit.ly/3bebLM2