【健康無價】健康不是第一而是唯一 鄭丹瑞專欄:疫情令人悟出有錢無命享的道理

健康 12:13 2020/08/05

分享:

鄭丹瑞專欄中引述朋友的經歷,指疫情令人悟出有錢無命享的道理。

「真係唔想講『一發不可收拾』呢六個字,但係依家嘅疫情,真係去到一個唔知點先至可以停落嚟嘅地步。」好事之徒在損友吹水群組慨歎。「書展取消咗,依家連幾個電影節都取消埋。」損友甲從事文化事業,七、八月是旺季,只可惜風光不再。

「有無蝕到入肉?」好事之徒問損友甲。「依家仲講呢啲嘢?依家係講健康,無健康嘅身體,就算俾你賺晒全世界嘅錢,都無命享。乖乖地留喺屋企,咬緊牙關捱過呢一關,希望可以遏止疫情繼續擴散,之後先至再講啦!」損友乙代答。他是一眾損友之中,最緊張財富的那一個,而他竟然語出驚人,爆出這個「無命享」的道理,實在令一眾損友拍爛手掌。

「自細老竇就教我:金錢第一,發達最緊要。但係我老竇就因為太多應酬,晚晚同啲客飲酒,傷咗個肝,得到肝癌,未到六十歲走咗。我都仲未知驚,不僅繼承佢嘅事業,仲發大嚟搞,啱啱『登陸』已經百病纏身,今次呢個疫情,我大部分嘅生意都被迫要暫停,對我嚟講,係好大嘅打擊。但自從限聚令後,我喺屋企唯一嘅工作就係好好休養,啲血糖指數返回正常水平;平時無凌晨三、四點唔識返屋企,依家天天早睡早起,仲可以喺個騎樓仔做下伸展運動,我終於明白一個阿媽係女人嘅道理,同各位損友分享:健康不是第一,健康是唯一。」

TOPick推出食物資料庫,搜羅本地多間餐廳及逾千款食物營養標籤,令您食得有營又健康,立即查看:bit.ly/2UJP4dx

實時追蹤香港各地區疫情個案,立即下載經濟日報App:https://bit.ly/2JdOaiS

全文刊於「經濟日報」,原題為「第一與唯一」

撰文 : 鄭丹瑞