【新樓樓花】從不買樓花怕貨不對辦 曾智華:不少朋友收樓時谷到爆

休閒 10:15 2020/09/17

分享:

過去的日子,我肥碌買過幾間樓,全部舊樓。有朋友問:「乜你唔喜歡住新樓咩?」

正常人,當然喜歡住新樓。但在香港,不少新樓都「假假哋」,所以,咪搞我!

點解假假哋?因多數新樓都會在得地盤加部分工程進行中就開售,賣樓花。

大佬,貨都未見過就大拿拿落一千幾百萬元決定?別人點樣我唔知,但就咪搞我。

小弟只買二手樓或現樓,因樓宇一切優缺點,一目了然,唔會似買新樓,有機會貨不對辦。新樓銷售書及廣告,多製造「美麗幻想」俾買家,不少為「空中樓閣」。

不過,無得怨人,願者上釣。

我認識無數老友,收樓時,谷到爆,其中一位乃政府高官,要親自揸住大疊彩色貼紙,將全間新樓變連儂牆,太多地方貨不對辦了。結果,當然投訴。不過,你投訴,發展商唔係無反應,但只慢慢逐樣執,令你半天吊損失慘重。

點解?因水電木工及玻璃工……瓣瓣輪流慢慢執,半年仍未收科。

意即,你根本無法入伙或開始裝修。半年租金等於幾多錢?結果,不少新業主投降自己搞。

小弟家住附近,過去五年有幾個大型新盤落成,又見證「過咗海話之你」情況。

有個千戶大盤,開賣時,嘩,出動數十花王搞到綠草如茵、鮮花處處,靚到飛起。

不過……如今入伙三年,單單外圍五百米的綠色花草,已變雜草叢生,原有植物大部分枯死。點解會咁?因為,氹你買時就「扮到天仙咁靚」,如今入晒伙,即「過咗海」,當然放軟手腳啦!

訂閱Telegram最新🍴✈️🎁優惠及送禮情報:bit.ly/3bebLM2

全文刊於《經濟日報》,原題為「過咗海後雜草叢生」

撰文 : 曾智華