【小一面試】面試班盛行小朋友狂操練 移民美國港媽:應改用play visit

教育 13:51 2020/11/19

分享:

香港ESF課堂。(Vikey提供)

之前同香港嘅朋友傾電話,佢話忙住帶個仔去「小一面試班」,train up下佢啲面試技巧。咩話?真係嚇咗我一跳!比個5歲人仔去上面試班?點知朋友話我out,仲話而家小一面試班好hit,10個細路有5個都上;剩返冇去上嗰啲,阿爸阿媽都會買本面試天書,喺屋企自己train。

面試最緊要「真」

面試呢家嘢,我都算有發言權。早喺2012年,我就係因為面試超過100次,出咗本教人跳槽嘅書,仲將我嘅經驗喺「蘋果日報」嗰度分享。之後入咗bank,我以recruiter嘅身份,面試咗求職者上千次有多。

喺大人嘅世界,面試班從未成為過潮流,諗唔到香港嘅細路行得咁快,全世界都要甘拜下風。其實面試最緊要「真」,雙方真誠嘅交流,清楚嘅expectation。因為呃真係呃唔到幾耐,返工之後好快見真章,呃得一時,唔呃得一世,盞嘥大家時間。

    點擊圖片放大
    +3
    +2

令人把幾火嘅面試題目

識我嘅朋友都知,我囡囡喺香港嗰陣,讀嘅學校係歷史最悠久、兼IB狀元最多嘅嗰間國際學校。之所以揀呢間,唔係因為佢有幾出名,亦唔係目標要成為下一個狀元,而係我深深認同佢嘅理念,欣賞佢對每一個細路成長發展嘅尊重。

喺嗰度讀完兩年幼稚園,基本上都可以一條龍,升小學再去中學。所以我從來冇諗過,香港嘅小一升學,競爭係咁激烈,戰場已經去到童年。

朋友話,面試班有齊所有名校嘅試題,好幫到父母為心儀嘅學校做準備。朋友俾咗份聲稱係囡囡舊校嘅試題我。真係唔睇由自可,一睇把幾火。例如:

「喺你嘅班裏面,坐喺你座位旁邊嘅同學叫咩名?」

「放學後,邊個幫你檢查功課?邊個教你做功課?邊個幫你喺手冊簽名?」

「雙位數加法,例如30+7;連加法,例如10+4+2」

「舉手搶答,問題圍繞時事或常識,例如行政長官是誰?財政司司長是誰?」

「play visit」取代「interview」

睇完朋友嘅分享,我認爲,呢個唔會係舊校嘅面試題目。因爲當年囡囡喺學校嘅上堂模式,冇固定嘅座位,隨便行隨便玩,連食snack都係坐地下picnic嘅。佢讀咗咁耐,都冇功課嘅概念,更加冇叫我哋喺手冊簽名。

據我所知,舊校無論幼稚園抑或小一嘅面試,都係將小朋友,放喺一個有好多玩具同圖書嘅環境,等佢哋自由發揮,老師從旁觀察。因為,面試從來都唔應該係一場背書默書嘅你死我活。用「play visit」取代「interview」,就係一啲國際學校唔錯嘅做法!

最緊要係,囡囡去play visit時已經好鍾意呢間學校,咁我無理由唔揀佢啫。

    點擊圖片放大
    +3
    +2

行慢一步就係進步

其實,好多面試班利用父母嘅焦慮心態呃錢之餘,亦喺度扭曲小朋友嘅童年,呢樣嘢先最無陰公。喺幼稚嘅年齡盡情去幼稚,合適嘅時候做合適嘅嘢;返璞歸真,行慢一步,實際就係大大嘅進步。

「When going back makes sense, you are going ahead. 」

撰文 : 陳曉瑋 Vikey Chen Facebook專頁「香港Vikey移民美國」版主