親子遊戲︱放下電子產品享受童樂時光 善用家中3樣物品變小朋友奇趣天地

育兒經 15:40 2021/02/23

分享:

可以善用家中物品設計親子遊戲。

買買埋埋喺屋企成堆玩具但小朋友已經玩厭咗?成日想減螢幕時間但又唔知有咩好玩?原來屋企有好多嘢搖身一變,都可以變成小朋友嘅遊戲素材,將屋企變成細路嘅奇趣天地!以下介紹簡單3款家居物件比各位家長發揮創意啦!

1. 尼龍繩

喺屋企搵個走廊位,或者拍埋兩三張高凳同牆之間形成一道走廊。用膠紙將走廊嘅兩邊牆用尼龍繩連接,痴5-10條唔同高度同斜度的尼龍繩,形成一個「激光陣」,搞掂之後小朋友可以嘗試喺身體完全冇掂到任何「激光」之下通過「激光陣」。

想挑戰難度嘅,可以試下拎住碗,碗入面裝三分一的水,小朋友挑戰成個過程都好好保護哩碗「聖水」,過陣都唔好倒瀉呀!

2. 毛巾

想訓練下小朋友嘅平衡力,冇得落公園行花槽邊,原來簡單用條長毛巾就可以!將長毛巾嘅長邊對摺再對摺,平放喺地下,就變成一條自製「平衡木」啦!小朋友可以喺上邊向前/向後行,又或者拎住隻裝住粒車厘子嘅匙羹,慢慢向前行而同時保護好粒車厘子。有咗哩條毛巾「平衡木」,只要改動小小元素,就即刻改變咗難度,變成新嘅遊戲!

3. 環保袋/枕頭袋

唔洗自己買袋鼠跳袋,用環保袋/枕頭袋都可以做到同樣效果!小朋友企入去個環保袋/枕頭袋,手抽住環保袋/枕頭袋兩側,好似袋鼠咁向前跳。家長可以喺地下擺啲cushion、水樽之類嘅障礙物,袋鼠仔要一邊跳一邊繞過啲障礙物,少啲計劃都唔得架!

正所謂創意無限,只要我地花啲心思,簡單家品都可以成為小朋友嘅玩具!同仔仔女女創造屬於你地嘅遊戲空間啦!

TOPick推出小學各級工作紙,參考名校精選試題,鞏固知識,緊貼學習進度。立即免費下載︰bit.ly/2X96KAZ

【hket TV家庭台】《湊得輕鬆啲》逢周三晚上10點伴你同行育兒路:https://bit.ly/35z6COD

撰文 : Rene Wong 兒科物理治療師