【投訴文化】智障員工被客人投訴後丟飯碗 鄭丹瑞專欄:不要吝嗇讚賞別人

休閒消費 11:17 2021/03/29

分享:

下次遇到人家的服務令你很受落的話,不妨向其上司稱讚一兩句。

「我老婆有一個壞習慣,好鍾意幫襯某間連鎖快餐店嘅漢堡包同奶茶,不過最近佢戒咗喇!」好事之徒說。「佢一定係受『健康旦』嘅影響,開始注重健康嘞!」一眾損友們猜測。「非也!只係呢間連鎖快餐店做咗一件令佢好唔開心嘅事。」好事之徒答道。

好事之徒開始講故事。話說,其妻經常幫襯開嗰間連鎖快餐店,請咗個智商比常人低嘅員工,但係工作表現相當好,既勤力又好客,好事之妻好鍾意一邊食漢堡包,一邊同呢位姐姐傾偈,覺得佢好單純,好善良。有一次,好事之妻又幫襯呢間連鎖咖啡店,發現呢個姐姐無再做,好奇問原因?

原來有客人投訴佢抹枱抹得唔乾淨,咁就被炒魷魚!好事之妻知道後,好唔開心,決定以後都唔再去幫襯呢間連鎖店,佢仲好慨歎咁話:『佢做得好,無人讚,唔會有人工加,但係只要有一個人投訴,就要俾人炒魷,真係陰公。』」

好事之徒續說:「我當時安慰老婆:所以我哋以後真係唔好吝嗇讚賞人哋,尤其是弱勢社群,佢哋好俾心機做嘢,偶然出錯,我哋應該包容,對佢哋好啲,唔好下下就投訴,趕絕佢哋。可能為咗逞一時之快,投訴投得好過癮,但係無諗過後果可以好嚴重,令到一個只係犯了小錯嘅人無咗份工。」

好事之徒講得很有道理,尤其是提到我們很吝嗇讚賞別人,覺得會「益咗佢」,下次遇到人家的服務令你很受落的話,不妨向其上司稱讚一兩句。

【hket TV家庭台】《靚太廚房》美點佳餚 每周六早上新鮮放送:https://bit.ly/38pYEYI

訂閱Telegram最新🍴✈️🎁優惠及送禮情報:https://bit.ly/3bebLM2

全文刊於《經濟日報》,原題為「吝嗇讚賞」

撰文 : 鄭丹瑞