ERROR「進軍」荷里活 無制限為《保鑣救殺手2》聲演宣傳片

娛樂 16:46 2021/06/09

分享:

ERROR聲演《保鑣救殺手2》宣傳片。

2017年上映的《保鑣救殺手》(The Hitman's Bodyguard),全球大賣逾13億港元票房,《保鑣救殺手2》繼續由「死侍」賴恩尼諾斯(Ryan Reynolds)、《復仇者聯盟》系列森姆積遜(Samuel L. Jackson)主演。
 
《保鑣救殺手2》強勢登陸香港,更邀人氣天團ERROR的肥仔(梁業)、阿Dee(何啟華)、193(郭嘉駿)及保錡(吳保錡)為影片宣傳片進行搞鬼配音。

保錡率先誇下海口:「我覺得,我哋今次配音做得好好,前無古人、後無來者!就算專業嘅配音員,都冇配到我哋呢個成就,因為專業配音員絕對唔會咁配,實在太勁!」

向來率直敢言的193卻有點保留:「我唔夠膽好似保錡咁講,呢個只係代表佢嘅立場!」肥仔亦加入戰團:「有咩網絡言論要攻擊保錡,記住係佢一個人講!」

保錡始終保持十足自信:「再講一次,都係前無古人、後無來者!認真得嚟又好似咁廢嘅話,得我一個做到!」阿Dee總結:「呢個配音好feel!」


 
ERROR互窒
 
ERROR四子均是《保鑣救殺手》的忠粉,保錡與193異口同聲:「超鍾意睇呀!」問到首次「進軍」荷里活的感想,保錡發表偉論:「我希望佢哋(戲中三位主角)同Marvel講,遲啲有個超人(角色)記得搵我做……佢哋好鍾意喺香港取景,幫我整個蜘蛛俠吖!」

肥仔忍不住插嘴:「Marvel冇超人㗎喎……你可以做曱甴俠!」193有更啜核提議:「叫保錡做沙律俠,淨係食沙律,係咁食,一食沙律就有力!」肥仔與阿Dee登時大笑,無力招架的保錡唯有認了:「係呀,素食主義!」
 
《保鑣救殺手2》雷霆萬鈞,再開第3集的話,阿Dee提出:「應該要拍個香港版,首先成本可以低啲!」肥仔早已度出絕橋:「食返個戲名(《保鑣救殺手2》),《保錡救殺手2》,下一集就係《保錡救殺手3》!」

193飛身撲出:「我就係嗰個殺手『3』,然後保錡唔係保鑣,其實係保安!」對於肥仔與阿Dee,保錡有以下安排:「肥仔就做返肥仔,阿Dee就係嗰個女人,黑人同肥仔都係同一個文化,搞掂!」