【黎明演唱會】跟鄭伊健首度同台合唱 黎明自創Leon之心示愛

娛樂 11:22 2021/07/16

分享:

黎明伊健兩位男神首合唱。

黎明「Talk & Sing紅館演唱會」昨舉行第六場,「古惑男神」鄭伊健擔任表演嘉賓,他率先示範Leon剛在台上自創的Love U手勢,全場尖叫。伊健稱2003年二人合作電影後,沙士隨之退去,寄望昨晚紅館合唱後疫情馬上消失,Leon與他擊掌叫好!

昨晚Leon第六場演出,方力申、姚子羚、蘇麗珊等圈中好友捧場,「金句王」Leon變身「手勢王」自創全新示愛手勢,用手指做圓圈動作放在眼睛前,表示「人群之中我只看到你」,全場冧爆!

二人曾合作電影《雙雄》。

之後伊健上台立即活學活用,Leon驚喜大笑。二人曾於2003年合作電影《雙雄》,伊健表示當時有兩件事最深刻,他對Leon說:「你記唔記有一場戲在一條好靚的隧道拍?那裡是化糞池,當時沙士好犀利,在這樣環境拍攝我好驚,但你好淡定,還笑著同我打招呼。當時我心諗:我們一齊拍戲,他都唔驚,我也不用驚。」Leon笑說:「其實我不知是化糞池,拍完返屋企先知道。」全場爆笑。

之後伊健又讚Leon好有紳士風度,說:「當年我們都好鍾意車,有一日我駕車到片場,Leon話想睇,我給他車匙,隨便玩啦!他打開車門無即刻上車,而先坐低,雙腳在車門外拍拍鞋底才踏入車廂,因為他不想整污糟架車,好有紳士風度,好有禮貌。大家要學呀,好加分!」

合唱《友情歲月》。

Leon自言一直都有這個習慣。伊健又說:「當年我們拍完套戲,疫情就消失,希望今次我們第一次紅館合唱之後,疫情盡快消失。」Leon立即與他擊掌叫好,然後他們背對背Chok住合唱《友情歲月》,全場揮動螢光棒大合唱。
 

撰文 : TOPick柴犬出動