為加拿大中文電台隔空表演 欣宜馮允謙憶初出道辛酸

娛樂 12:41 2021/08/02

分享:

鄭欣宜和馮允謙為《加拿大中文歌曲創作大賽》決賽任表演嘉賓。

在加拿大成長和讀書的鄭欣宜(Joyce)和馮允謙(Jay Fung),最近齊齊接受加拿大中文電台邀請,為網上《加拿大中文歌曲創作大賽》決賽任表演嘉賓。

雖然二人不能親身飛到當地,但日前在香港拍攝表演項目時,坦言心繫當地的家人和朋友,兩年沒有見媽咪的Jay隔空俾心心,熱情的Joyce亦對Auntie大講「I love you」。

想念加拿大親人

Joyce在溫哥華土生土長,而Jay一歲半隨家人移民到Edmonton,為了堅持追尋音樂夢,先後回港發展,受疫情影響,他們接近兩年沒有飛加拿大。

Joyce表示每年都會飛回溫哥華或多倫多最少一次探親,前年更到當地參與慈善活動。今次她選唱《@princejoyce》和新歌《先哭為敬》:「自細聽『加拿大中文電台』,因為婆婆好鍾意聽。今次表演,有一種返屋企嘅感覺。」

父母和哥哥都在加拿大的Jay Fung接近兩年沒有回「加」,非常掛念。

今次是他首次參加當地舉辦的活動,媽咪特別開心:「媽咪知道我今次表演好開心,仲專登去搵我哋做封面、報道今次活動嘅雜誌。兩年無見媽咪真人,好掛住佢。今次揀咗兩首自己創作和參與嘅《思念即地獄》和《山旮旯》,一路唱一路諗住媽咪,佢話會叫埋啲朋友一齊睇。」

合唱陳奕迅《陀飛輪》

除自己的作品,Joyce和Jay Fung還合唱陳奕迅的《陀飛輪》,Joyce說:「呢首歌詞好適合呢個時候,呢兩年好多人都唔可以飛去第二度見屋企人,希望大家聽住我哋嘅歌,想住掛念嘅人。」

表演開始前,Joyce和Jay Fung接受主持人訪問,分享追尋音樂夢的經歷。

Joyce表示自己最困難係入行最初幾年說:「好多負面聲音,話我揀嘅路係錯。甚至初入行時有一位我好尊敬嘅前輩,叫我唔好唱歌!但我堅持,慶幸我有能力追夢,堅持夢想。」

回憶初出道時

Jay安慰她說:「依家證明你入行係正確,好成功。無論做咩都會有障礙,或者會有人懷疑你嘅能力,所以只要專注你要做嘅事,相信自己。」他表示十年前隻身來香港參加歌唱比賽和發展音樂事業,難以適應。

他續稱:「最初唔習慣天氣,點解去到邊到超多人?又熱又無自己空間。加上我中文唔叻,就連去茶餐廳都唔識睇餐牌嗌嘢食,有時會偷睇隔離枱食乜就照跟,否則只識得叫『叉燒燒肉飯』,所以以前食好多呢款飯。」

Joyce笑問:「咁你依家係咪食怕咗?」Jay說:「哈哈,未怕,仍然好鍾意食。」

她並透露從加拿大帶了一件20年前的物品放入新歌MV成為彩蛋。而Jay表示即將舉行音樂會,另外還會替其他歌手做監製、作曲和編曲等工作,很忙碌又很期待,身旁Joyce替他開心。

撰文 : TOPick柴犬出動