【MIRROR成員】姜濤以歌紀念亡友 姜B親解《Dear My Friend,》MV密碼【有片】

娛樂 13:43 2021/08/07

分享:

姜濤為新歌《Dear My Friend,》拍MV。

MIRROR繼盧瀚霆(Anson Lo)、柳應廷(Jer)和呂爵安(Edan)後,「MIRROR夏日企劃」輪到人氣王姜濤接捧,推出年度第二支個人單曲《Dear My Friend,》。

談到新歌的創作理念,姜濤坦言希望藉著歌曲,為已故摯友(花名:中峰)獻上最後的一封信:「《Dear My Friend,》係為咗紀念一位離開咗嘅朋友,歌名亦都係我諗嘅,好想話畀大家知,呢首歌係專屬於佢;希望大家聽歌嘅同時,可以望下身邊嗰位最親近嘅人,好好珍惜佢哋。」

【MIRROR X ERROR】姜濤與姜糖製蛋糕為阿Dee慶生  一哥何啟華大讚:真的很好吃!

    點擊圖片放大
    +4
    +3

雙林打造新歌

故人玉樹長埋, 作為好友的姜濤雖然有意以歌悼念,卻坦誠起初一度採取「拖字闕」:「可能唔想面對朋友已經離去嘅事實,所以當初喺揀曲方面拖咗好耐,而且喺一時三刻亦好難搵到一首好稱心嘅歌。」

今次此歌由林奕匡作曲、林若寧填詞,姜濤說:「最後聽到林奕匡寫嘅呢隻歌,形容一聽就有命中注定感覺;至於填詞方面,因為林若寧老師係一位好擅長描寫故事嘅作詞人,所以我同監製Edward講,方唔方便搵林老師聽下我呢個故仔,睇下佢有乜感覺,然後就促成呢件事。」

日前姜濤為《Dear My Friend,》拍攝MV,特地走訪機場、籃球場、表演場館等多個拍攝地點。

當中最令他難忘的場景,絕對是靈堂一幕,自認哭點高的他亦不禁眼角失守、淚灑當場:「導演希望我寫一封信畀呢位朋友,然後喺靈堂讀出嚟,但係我寫唔出,因為我有太多說話想講,所以我建議乜都唔寫,由得我自言自語。」

他續感慨稱:「因為呢段時間好忙,我想藉著呢個機會,同佢好好傾偈,所以封信只係道具,其實喺MV入面我都係同佢分享我嘅近況、佢屋企人嘅近況,講講下就喊咗出嚟;另外因為製作組預備咗一副假棺材,完咗嗰場戲之後,我都一直望住個棺材係咁喊。」

    點擊圖片放大
    +3
    +2

重現好友造型

那些年的少年因籃球結緣,為紀念識於微時的珍貴友情,導演特地加入不少籃球元素,姜濤亦親自拆解多組神秘密碼:「因為我呢位朋友係做飛機維修師,所以我哋突登喺機場隔離拍攝奔跑場面,起初仲想拍埋飛機起飛,寓意佢嘅離開,可惜最後因為落雨拍唔到。」

提到MV後段以卡通形式呈現好友,營造二人在籃球場對望的畫面,姜濤坦言:「真係根據佢嘅衣著打扮嚟塑造,對我嚟講感觸好大,雖然我唔知佢依家係以乜嘢形式存在,但係我希望佢可以喺呢個MV出現,我相信當下我係同佢對視,亦都希望佢睇完之後可以安息。」

同場加映:姜濤專訪

撰文 : TOPick柴犬出動