【演鬥聽】譚嘉儀Rock妹上身 王梓軒大讚一眾嘉賓表現出色

娛樂 13:16 2021/08/27

分享:

(左起)李妍、譚嘉儀、王梓軒、何雁詩、龔柯允在《演鬥聽》騷音樂才華。

TVB節目《演鬥聽》在本周六(8月28日)將會播映第3集,今次4位嘉賓都是唱得之人,包括譚嘉儀跳出框框Rock妹上身,何雁詩忽然變了何jazz,新人李妍佛系唱歌,而馬拉歌手龔柯允就大膽挑戰Bollywood style。
 
譚嘉儀興奮稱:「我自己中學時都有夾band,但入咗行後好少唱啲rock嘅歌,今次係一個突破,可以喺《演鬥聽》試到我一直都好鍾意嘅pop rock,我覺得成個節目好多嘢玩,將啲歌曲改編成唔同風格,又要我哋自己創作啦!」

她表示平時很少rap:「今次有機會rap幾句,雖然好緊張,不過可以將我哋自己嘅歌改編成唔同style去唱,我覺得超正㗎!」

何雁詩唱Jazz
 
何雁詩則表示:「我唔係特別叻唱Jazz,只係鍾意聽,今次可以發揮吓!同平時嘅風格唔同,平時自己出歌會俾人produce晒,聽過十萬次先拎出嚟,今次係一個未出街前版本,好緊張!」
 
新人李妍稱:「因為時間唔係太多,今次音樂嘅準備元素都多,都驚會記唔到歌詞呀,個廠又凍,喉管又會收縮啦!好彩so far都ok!」
 
龔柯允亦謂:「其實jam音樂係一件開心事,一有音樂,個人會跟住節奏郁,今次仲要咁多唔同嘅風格,雖然係好大嘅挑戰,不過都會嘗試去玩,喺〈我點你作〉嗰part,我就好搞笑㗎。」

她續稱;首歌充滿馬來西亞風情,有華人、馬來人、印度人,好似咖哩嘅感覺好rich,同埋有印度唱腔,我自己都好鍾意模仿唔同種族嘅唱歌聲。」

王梓軒讚嘉賓出色
 
對於4位嘉賓嘅表現,王梓軒大讚:「其實我哋個騷本身都係想搵番嘉賓最強嘅嘢,可能係音樂、可能係幽默感、可能係性格、可能係表演風格。今次好開心無論平時寫歌嘅朋友,或演繹上好高超嘅朋友,都可以玩得盡興。」

他高興表示:「我哋邀請新人,大家未必好認識佢嘅面孔,但佢嘅聲音同創作都好好,李妍都好好。何雁詩、龔柯允同譚嘉儀大家已認識,3個性格好唔同,何雁詩有深造jazz,我師傅阿熹話龔柯允係天上嚟嘅聲音,但係佢都可以好搞笑,斯文嘅譚嘉儀可以跳出框框,做到活力、反叛嘅表演。」

梓軒續指:「我哋希望每位歌手嚟到都有啲度身訂造嘅嘢俾佢哋玩,當然我哋都有好多即興嘅創作啦!」

他指大家在現場都絞盡腦汁:「每次嘅opening我哋都唔係就咁叫個名出嚟就登場,我哋想將佢哋嘅成名作改編,將幾個歌手拉埋去一個曲目到,大家好似有個好澎湃嘅出場,今次準備咗3日,再加排練及拍攝用咗5日。」

但梓軒覺得一切都好值得:「見到好音樂,見到演鬥band發揮得咁好,每一集都搵到新嘅方法去表現自己,我哋鼓手Joey,你唔好以為佢啞嘅,其實佢係rapper,一路係咁打(鼓),佢一開口就點石成金,希望演鬥band每個人都可以發亮。」