【演鬥聽】劉威煌爆布志綸秘密 曾比特坦言節目具挑戰性

娛樂 14:08 2021/09/02

分享:

最新一集《演鬥聽》邀陳潔靈任嘉賓。

周六晚將播映第4集《演鬥聽》,今次王梓軒邀請了布志綸(Alan)、劉威煌、曾比特(Mike)及周詠婷(Kerryta),來個音樂格鬥。
 
近年甚少現身綜藝節目的Alan,今次上《演鬥聽》大讚過癮:「音樂最緊要係玩,要happy,同埋我知道Jonathan要介紹呢個節目係比較free jam,唔係咁多規矩,所以覺得幾好玩。我有夾band,又有個人嘅歌曲、專輯啦!音樂都係同多啲唔同嘅人玩啫!」

Alan準備特別素材

今集Alan準備了特別的素材《我點你作》,Alan稱:「我拎咗一個ig 嘅post,講一個日本地區,叫『志布志市』,同我個名差唔多,用咗呢個post嘅內容,而叫布志嘅又有一架郵輪,咁就做咗個free jam session,首歌好正好滿意,同以前風格好唔同。」

Jonathan提議Alan將呢首歌出碟,但Alan搞笑話:「出碟冇人買㗎!(會唔會灌錄?)我當今晚錄咗㗎喇!哈哈!」
 
與Alan同組嘅Kerryta就話:「一開頭收到呢個邀請時,真係受寵若驚,因為我覺得應該好challenging。」

新版演繹《李香蘭》
 
對於要唱neo-soul版《李香蘭》,Kerryta話:「我覺得好玩,我自己本身都好鍾意呢首歌,估唔到竟然抽到自己鍾意嘅neo-soul,抽到自己鍾意嘅歌曲改編,好幸運。」

問到兩位師兄有冇過料俾Kerryta時,Alan話:「《李香蘭》係一首好好聽嘅歌,Kerryta有埋外型,好sexy嘅一個感覺。」梓軒補充話:「其實首歌好聽已經贏一半,把聲又好聽,又贏埋嗰一半,我哋陪企啫!呢個就係李香蘭,然後我哋眺望佢喇!」
 
另一組嘅嘉賓劉威煌邀請了音樂監製葉肇中一齊上《演鬥聽》,威煌話:「因為Jonathan走咗去隔離組,佢係主持,走去隔離組,我覺得唔公平,我帶番個音樂監製嚟幫我哋,我好多歌都係阿中作嘅。」
 
威煌叫到,阿中當然唔會托手肘啦,阿中話:「希望佢唔會失禮人啦!哈哈!講笑啫!希望大家可以玩得開心,輕輕鬆鬆嘅作品又可以介紹俾大家聽。」

於《我點你作》一環,威煌出賣布志綸,將佢嘅口訊用作素材,威煌反駁:「冇出賣佢,只係節目組要求,希望搵啲搞笑嘅voice msg出嚟,咁啱今集對Alan,本身佢個人係好認真嘅,但佢唔係好識推(拒絕)我,所以攞咗呢個voice msg出嚟,好搞笑,佢推得好婉轉,不過我拎出嚟之前都有問過Alan,當然要尊重番佢,佢覺得ok、好笑嘅……」

問到上《演鬥聽》的困難及壓力,曾比特話:「除了落大雨塞車,最困難都係創作嗰part,臨尾要創作4個bar,我平時寫作方面都爭少少,同埋要喺一個好短嘅時間創作出嚟,幾有挑戰性。」

威煌補充話:「雖然得4個bar,十秒好快,但要即刻搞都難㗎!」Mike續指話:「我有壓力㗎!你哋個個都係高手,咁多高手雲集,主持人又係Jonathan,我作為新人遇到咁多前輩,我自己都好驚㗎!」威煌笑言,依家啲小朋友好識講嘢!

撰文 : TOPick柴犬出動