【流金歲月】張文傑首次演繹暖男 與女神梁詠琪合作既興奮又緊張

娛樂 11:05 2021/09/06

分享:

《流金歲月》MV

張文傑(German)早前為MIRROR姜濤及ERROR肥仔梁業的MV《特務肥姜2.0》任動作設計兼演反派而人氣急升。他最近又獲梁詠琪(Gigi)邀請參演新歌《流金歲月》MV。

視Gigi為女神的張文傑興奮表示:「緊張咗幾日,拍攝當日坐車到現場時,仲好緊張,我好耐冇試過咁緊張!我好喜歡睇《初戀無限Touch》,希望有一日做佢既沈志康(陳曉東飾演),仲好記得佢唱:地下鐵碰着他。」

《流金歲月》MV

German初時以為有動作打鬥場面,當導演Maggie告訴他演繹前夫一角,回顧結婚後甜蜜幸福時光畫面。

不過German心情極為複雜:「好興奮又好膽心,除咗動作戲份,一直都想挑戰唔同既角色。但膽心自己演得唔好,因為從未試過演繹咁溫馨角色。」

拍攝當日見到Gigi時,German即時投入:「已經唔可以尷尬,要忘記緊張,只係全程投入,已經當左Gigi 係我最愛既人,望住佢,幻想同佢一齊時候既美好,一路感覺到好甜美。」

German感謝導演Maggie:「演真係好大膽,我有少少懷疑導演係咪認錯人。今次演繹呢個角色,俾人睇到我嘅另一面,俾人知道German唔係淨係識得打打殺殺。不過好難抽離角色,因為我掛住Gigi幾日,個心好囉囉攣。」

撰文 : TOPick柴犬出動