【虎媽教育】6歲男童周六周日上足8個興趣班 虎媽:識多幾樣考名校易入點

親子 18:11 2021/09/25

分享:

男童周六周日不停上興趣班。

假若我肥碌有個咁嘅阿媽,必定日日夜夜諗點逃離佢「魔掌」!

講乜?上周六早上10點,跳上綠色專綫小巴,剛剛前面坐着一對母子,個仔睇嚟應該6歲左右,無乜神氣,大近視,手執網球拍,背脊再孭個小提琴。睇款,剛操完網球,因左邊有位網球教練拖住一鐵箱球,與母親閒聊。

「乜太,帶阿仔返家休息?」

「唔得!佢周六周日好忙㗎!今朝先跟你操完兩小時網球,依家搭車出尖沙咀補習英文。中午半小時食飯小休,下午兩點學小提琴、三點半補習普通話。到明早8點學游水、10點練書法,下午兩點修讀樂理班,然後,7點直落油畫班!」

「放兩日假都上足班,會唔會好辛苦呀?」教練笑笑口望住兩母子問。

阿仔明顯俾虎媽操到呆呆地,根本無晒童真,亦唔識反應。但阿媽則搶白:「佢好叻㗎,學乜都好快上手。總之,識多幾樣,考名校易入好多㗎!」

「咁,佢有無打機呢?」

「有!正因太喜歡打機,我就同佢交換。若周六周日上足班,返屋企沖完涼,食埋晚飯就可打機兩小時。」

聽見「打機」兩字,才見到小朋友罕有地有多少表情。其他時間,總是呆呆的。

我肥碌慶幸童年無機會「享受」這種監粗來、高壓要參加的「興趣班」。小弟幻想,若真有家長美其名「為你好」而對小弟如此,我肥碌必定第一時間想辦法逃離「魔掌」,有咁遠走咁遠,盡快忘記呢種恐怖經歷。誰會喜歡日日被「強餵興趣」的呢?

最新影片推介:

全文刊於《經濟日報》,原題為「呢個虎媽極得人驚」

撰文 : 曾智華