【聲夢傳奇】泳兒與林君蓮冼靖峰網上開騷 家人月餅蛋糕為Vincy慶生

娛樂 11:35 2021/10/09

分享:

泳兒與《聲夢》學員林君蓮及冼靖峰crossover多首歌曲。

選秀節目《聲夢傳奇》雖已告一段落,但身為導師之一的泳兒(Vincy)依然與一眾《聲夢》學員在音樂上頻頻交流。日前,Vincy舉行她首場「INTO THE THORNS LIVE」,便請來兩位《聲夢》學員林君蓮(Kaitlyn)及冼靖峰(Archie)任嘉賓,三人crossover唱出多首歌曲,不少網民讚具新鮮感。

live甫開始,Vincy便唱出其暗黑系列第一章節的第一首歌《野木蘭》,接着便與Kaitlyn合唱《所有遺失的東西》、Archie亦跟Vincy合唱重新編曲的《荊棘海》。唱完後,Vincy即表示《荊棘海》很適合Archie,Archie亦自言很喜歡繹一些玩味重的歌曲。

泳兒與冼靖峰

泳兒讚冼靖峰勤力聰明

隨後Vincy謂這是她YouTube Channel有史以來的第一個Live音樂會,Kaitlyn跟Archie聞言即受寵若驚,Archie說:「其實一開始我係好驚,因為今次係完咗比賽、演唱會後,我哋第一次的合作。」Kaitlyn則謂明白Vincy揀選《所有遺失的東西》給她唱的原因:「啲歌詞好有意思,我都好鍾意。」

演唱期間,不少網民都話這個配搭十分新鮮:「超正!」、「高水準!」、「《荊棘海》合唱版超級爆炸、越聽越好聽!」

問到找Kaitlyn及Archie任嘉賓原因,Vincy直言:「覺得佢兩個都唱得好好,音樂上,譬如Archie好多曲風都carry得到,所以今次除咗佢自己揀咗啲歌,都會揀自己一啲暗黑系列俾佢唱;Kaitlyn都係啦,雖然我哋之前唔係同一個team,但係都有接觸,覺得大家喺音樂上或者喺衣着上的品味都有啲相同,所以今次Live就邀請咗佢哋兩個。」

Vincy續說:「我欣賞Archie好勤力、聰明,同埋佢都好願意挑戰自己、嘗試唔同的嘢。譬如今次唱《荊棘海》,雖然一開始佢覺得隻歌係幾有難度,但佢都好願意去嘗試。」

泳兒與林君蓮

泳兒稱林君蓮聲線有個性

至於對Kaitlyn的評價,Vincy稱:「有把好好、好有個性嘅聲線,喺呢個樂壇裏面係比較少出現有呢一種聲線嘅女歌手,所以希望佢可以好好再發掘呢把聲,點樣再去用到爐火純青,佢係好有potential,因為我覺得聲音係天生,冇得去改變,佢有一把得天獨厚嘅聲音已經係邁向成功嘅一大步。」

問到今個月16日生日的Vincy如何慶祝及生日願望,她表示:「都係同屋企人食飯,中秋節嘅時候順便慶祝埋,亦都食咗我人生第一個嘅月餅蛋糕。」

Vincy幽默稱:「我發覺原來屋企人都幾有創意,佢哋喺月餅上面唧滿晒cream,然後再插蠟燭,外形係唔錯,但一食落去嗰個味道同口感好難形容,好複雜,我都係純粹意頭咬一啖,之後真係搞唔掂,哈哈。」

不過大嘆沒相片紀念這歷史性一刻:「因為換咗電話,我又唔識搞,電話入面資料冇晒。所以我今年其中一個生日願望係希望有番電話面嘅資料。」

最新影片推介:Anson Lo專訪

撰文 : TOPick柴犬出動