【重男輕女】外父迫改裝修生仔辱罵孫女蝕本貨 港爸發火趕客:女兒是我命根

育兒經 17:41 2021/10/27

分享:

重男輕女的外父辱罵孫女是蝕本貨,港爸保護愛女發火趕客。

家人幸福的笑臉是工作的原動力。有名港爸工作收入可觀,不過壓力大,直至兩年前做了爸爸,回家看見女兒才沒那麼繃緊。2歲的女兒是他的心肝寶貝,可是外父一家重男輕女,一直虧待女兒即他的太太,近日更辱罵孫女蝕本貨,令港爸心痛及氣憤。

女兒笑臉紓緩工作壓力

facebook專頁「辦公室日報」近日分享署名為「曉彤爸爸」讀者的投稿,工作壓力大的他在兩年前榮升爸爸,回家看見可愛、愛笑的女兒曉彤,即刻冇晒戾氣,感謝老婆十月懷胎將曉彤帶來世界。

無論做嘢幾咁辛苦都好,睇到個女開開心心,健健康康咁成長,真係乜都抵返晒。

外父重男輕女

2歲女兒一直是開心果,深得人心,可是,外父卻不喜歡孫女,連帶那邊的親戚亦受影響。事主指出未結婚時已知外父重男輕女,老婆的弟弟長期無工作,日日在屋企打機瞓晏覺,外父放任兒子,卻無理要求女兒(事主老婆)做事,包括要求為無業弟供樓、賺兩萬多付一萬家用等。

外父竟然叫我老婆幫個細佬畀首期,仲要我老婆幫手供……外父同佢個仔當時自把自為去睇埋樓,首期講緊幾廿萬,供樓講緊萬幾蚊一個月,我老婆冇佢自己嘅人生㗎?最後梗係拒絕啦。

外母生前提及,當年懷著女兒(事主太太)時,外父曾經說生仔就自己養,生女就賣出去,指有個同鄉想用一萬蚊買個BB,幸好外母堅持不肯,聽到都覺得荒謬,但外父絕對不是講笑。

最新影片︰任喇沙書院劍擊教練逾30年  曾俊華談學習劍擊之道

辱罵孫女蝕本貨

自從老婆誕下女兒後,外父及親戚未停止過催他們兩公婆生仔。事主不想老婆難做,一直忍住不去討厭外父,可是有次外父觸及底線。今年新年,外父帶同親戚上來食新年飯,再次重複說孫女是蝕本貨。

話咩得意又點吖,最後咪又係蝕底畀男人,又話女仔唔使讀咁多書,當時我個女坐咗喺度㗎,雖然得兩歲人仔好細個,但你哋識唔識尊重?

港爸愈聽愈扯火,不想再聽而到廚房洗碗,可是外父「導遊」上身,帶親戚走去參觀孫女的房間。

猛咁指指點點話粉紅色唔好,太多公仔唔好,床單咁女仔唔好,叫我哋換晒佢,改過間房將來生仔用,可能大家會覺得好小事,不過我就忍無可忍,喺廚房衝出嚟大聲喝咗句:「全部同我躝!」

當時親戚嚇呆問發生何事,港爸嬲怒地說︰

曉彤係我嘅命根,你班人踩夠我個女未?仲有間屋係我賺錢買嘅,唔輪到你哋指指點點!你哋認真又好講笑又好,有咩資格要求我個女間房點樣佈置?

港爸發火趕客

老婆見狀,亦有出聲要求親戚離開。外父看著親友著鞋離開,自己沒離開的意圖,事主補多句:「你都走呀!」。港爸當刻有感自己做法過火,雖然至今仍與外父不和,沒有再見面,但他沒後悔,

我都唔想曉彤大個之後知道公公唔錫佢,句句都話佢冇用、蝕本、遲早畀人呃之類,佢而家兩歲啫,大個咗就會識得聽同埋有感受,我唔想影響個女嘅心智同發展,所以外父可以慢慢嬲,I don’t care!係辛苦老婆仲要每個月返去一次擺低家用啫。

網民建議停家用不聯絡

網民支持港爸,大罵外父乞人憎,紛紛建議家用也不要給,「蝕本貨當然要留個錢自己傍身」、「呢啲老公,阿爸先係男人,保護到自己老婆同個女」、「嫁出去嘅女潑出去嘅水!以後唔好聯絡」,更多留言見下圖︰

    點擊圖片放大
    +10
    +9

文章獲「辦公室日報」授權刊登,原文可見網頁

TOPick推出「Band1學堂」,更多教育升學資訊:https://bit.ly/3a6HT6T

【hket TV家庭台】《湊得輕鬆啲》逢周日早上10點伴你同行育兒路︰bit.ly/35z6COD

責任編輯:顏紫燕