【梅艷芳】梅姐失聯21年大姨甥潘文皓談近況 梅愛芳長子:媽咪在天上一直看顧住我同細佬

娛樂 18:13 2021/12/04

分享:

分享:

電影《梅艷芳》上映以來叫好又叫座,在明日(12月5日)的香港電台《舊日的足跡》內,播出主持車淑梅長途電話與梅艷芳失聯21年的阿梅大姨甥潘文皓的訪問。

梅愛芳長子潘文皓日前在 Facebook中表示已看了《梅艷芳》3次,淑梅姐與潘文皓足本對話如下:

潘文皓:係嘅,我睇咗3次,第1次嘅感覺難以形容,長期處於想流淚同流緊淚嘅狀態,再睇第2次 、第3次都有唔同嘅感覺,有好多地方好感動 。

當見到媽咪同姨姨喺舞台表演嘅時候,眼淚不禁流落嚟,我可以親眼見到佢兩個寶貴嘅姊妹情。細個嗰時見唔到嘅媽咪走嘅時候我7歲,姨姨走嘅時候我11歲,我唔喺佢身邊。

有日,同王丹妮通電話,當時佢喺香港嘅戲院謝票,透過視像講咗幾句,佢戴上口罩眼神好似姨姨嗰陣時我好感動,有機會真係想同佢傾多幾句。 

淑梅姐 :你係咪一直喺溫哥華

潘文皓: 其實6年級開始就喺呢邊知道有呢套電影,我一定要睇,裡面一定會講好多有關媽咪同姨姨嘅事,爹哋 、細佬都有睇印象中,媽咪(梅愛芳)係一個好稱職嘅媽咪,好畀心機教我同細佬,腦海裡邊好難想到一個畫面佢鬧過我哋 。佢係一個好積極樂觀嘅人,遇到乜嘢難題都係笑住面對,正如電影情節一樣。

姨姨係一個好直、好有為 、好堅強嘅人,佢好鍾意講笑令身邊人開心,時時刻刻為人哋設想 。細個嗰時我有少少驚佢,因為佢把聲好有力量同埋威嚴,有冇俾佢鬧過我唔記得,但係我真係有少少驚佢,我知道佢係大明星,佢係個永不放棄嘅人,電影中佢話:『 只要有信心、世上無難事 !』呢一句正正喺佢生命話俾我哋聽。

    點擊圖片放大
    +3
    +2

淑梅姐:你知道姨姨一直搵你哋嗎?

潘文皓:我只係呢一排先知道……當年我哋唔喺香港,唔知佢搵我哋,如果知道,爹哋一定會帶我同細佬返嚟見佢,所以當我知道佢一直有心搵我哋,亦係佢臨終前一個心願,真係覺得好難過。

我而家大個咗,可以幫佢完成心願,即係佢可以搵番我哋喇!其實呢兩三年,我有同姨姨嘅fans聯繫返先至知道有呢套電影,知道有呢一件事。

    點擊圖片放大
    +3
    +2

淑梅姐:你哋嘅近況如何?

潘文皓:我28歲,有女朋友未結婚,而家做IT工作。細佬都好好,佢都係做IT電影後期嘅工作。爹哋好好,身體好好,好健康。我都想返香港,如果可以,嚟緊呢半年內會返,上次2017年返過嚟,今次會探婆婆,佢98歲,我好想返去見佢。

淑梅姐:身為媽咪同姨姨嘅新一代有咩感覺?

潘文皓:其實當我知道今次有咁多人仲係掛住佢哋,我好感動。做媽咪嘅仔、姨姨嘅姨甥有種壓力,我好想學識佢咁樣,嗰種生活態度、處事方式,因為覺得佢種生活態度、處事方式。因為我覺得佢哋好堅強、好樂觀積極!

最新影片推介:《全民造星IV》熱門人馬專訪

淑梅姐:你喺Facebook嘅中文寫得好好,有咩原因呢?

潘文皓:我一直喺溫哥華生活都有睇無綫,因為有字幕,所以我記得。聽日會睇(《梅艷芳》)第四次,隔幾日睇一次,直到落畫,因為每一次都有唔同感受。我覺得Fish(廖子妤)好似我媽咪,特別佢短頭髮嘅時候,我好多時會睇返以前啲相。

三次睇都流眼淚嘅就係見到姨姨探媽咪,媽咪病床上有張相見到我同細佬,佢望住話唔知可唔可以睇住我哋長大,就係呢一句,聽到好難過……好遺憾佢唔可以睇到我哋長大,但,我想同媽咪講 ,佢喺天上一直看顧住我同細佬,所以我哋唔可以做一啲令佢失望嘅事,我會好好咁生活落去 。

姨姨佢嗰種精神,將所有精神同時間貢獻畀歌迷、音樂、舞台……遺憾佢冇結婚,最終嫁咗比舞台同大家,佢呢個態度好值得大家敬佩,我希望佢知道而家仲有好多人繼續愛佢,掛念佢。

我要同電影團隊講,好多謝佢哋,呢段時間到處都有疫情,要為大家打氣,電影帶出咗呢種正能量同態度,值得我哋學習,好多謝佢哋!

淑梅姐:有咩要對媽咪同姨姨承諾?

潘文皓:就係我要好好成長,好似佢哋咁對自己同對身邊嘅人……姨姨講過希望有一晚,大家食完飯出去望住星星嘅時候,會記得佢,一個曾為我哋帶來小小歡樂嘅朋友,會記住佢個名叫做梅艷芳,我會一路一路記住佢哋,永遠以佢哋為榮 !

於專訪最後,潘文皓更特別補充:「其實我同細佬好想多謝姨姨留俾我哋嘅教學基金,等我哋可以順順利利咁讀完大學,而家又有一份幾好嘅工作。」

撰文 : TOPick柴犬出動