【MIRROR成員】姜濤拍紀錄片坦承求學時期極自卑 姜Man:唔好太容易定義一個人

娛樂 12:19 2022/01/26

分享:

分享:

MIRROR成員姜濤的個人紀錄片《答案》第3集「最終章」於昨晚(1月25日)上架,片段中記錄姜濤逛商場、重返母校、拍攝歌曲《鏡中鏡》MV的情況,姜濤在影片中真情剖白,稱自己在學時期是自卑、沒有自信,又提到自己學會找方法與負面聲音共存。

最新影片推介:193、肥仔專訪

曾向花姐提出改名

今集先播出姜濤過往接受訪問的片段,他說自己不喜歡「姜濤」、「姜B」,更曾向經理人黃慧君(花姐)提出可否改名,可惜大家在節目中已對這個名字定型。

接着播出他於《2021年度叱咤樂壇流行榜頒獎典禮》獲獎片段,他說:「可能人哋睇我喺好高峰位置,其實我真係跌得好低,可能你睇嘅嘢真係相反,可能你睇到嗰個人嘅表面同佢內心所想嘅完全相反,所以千萬唔好太容易定義一個人,冇人定義到。」

    點擊圖片放大
    +4
    +3

姜濤逛商場、返母校

他在影片中坦然:「入行頭一兩年可能有嗰個比賽光環,但漸漸到咗第三年攞埋獎之後,就開始覺得自己畀自己嗰種感覺唔同,自己care嘅嘢多咗,每個人講一樣我唔好嘅嘢,我都會好執着,喺度諗一啲好無謂嘅小事,跟住愈嚟愈唔開心。」

後來就播出他逛商場、乘搭港鐵的情況,然後就播出他重返母校的片段,他既教職員合照、又走到首次演出的禮堂。

他又大爆過往自卑一面:「我所有嘅自卑、童年嘅唔自信,都係來自呢間學校,我唔係話呢間學校唔好,純粹係我喺呢度經歷嘅所有嘢,喺呢度愈自卑、愈唔懂事,大個先愈嚟愈變得懂事,我嗰陣太肥,每次學校有游水堂,我都會企喺泳池隔離,唔會除衫,嗰陣時每日跑步都會望住啲學生,跟住覺得好自卑,以前我就成日喺度射波!」

    點擊圖片放大
    +9
    +8

解構新歌《鏡中鏡》

姜濤指,自己起初是以新歌《鏡中鏡》是想反擊其他人:「唔好再咁樣睇我,但諗諗吓又覺得冇乜嘢意義,我出完又點呢?」他認為要找方法令自己堅強,承認自己內心有不好的聲音,需要想方法與它們同行。

他續稱:「其實個答案已經知係乜嘢,好似好多道理大家都知,但真正做到個道理要你做嘅事,都要經歷好長嘅時間,起碼我搵到個方向,知道邊條係啱嘅路,拍完呢個紀錄片,出完呢隻歌,都會有唔開心嘅時候,但起碼我知道有個方法。」

姜濤希望樂迷聽完《鏡中鏡》一次,找到自己的答案後就不用再聽,如找不到就再聽下去。

    點擊圖片放大
    +4
    +3

姜濤:自己可以再Open啲

另外,他又說:「其實每個作品幾乎都有自己嘅意見, 第一年自己話事權少啲,做藝人好神奇,因為你可以將自己內心嘅情境一步一步咁實現出嚟,有咁多人幫自己,只可以講好難得。」

姜濤認為自己可以再開放,因為自己一直以來我沒有分享太多自己的事,只可以說在團隊中經歷的事,不會說太多自己過往的事。

    點擊圖片放大
    +3
    +2

不會忽略外界聲音

姜濤經歷低潮,他指自己、其他人有低潮時也可以看這段影片:「你會唔會唞吓先,會唔會返去你以前先?」

他續指:「希望大家睇完之後俾啲意見,我覺得唔同嘅人睇完都有唔同嘅意見,雖然呢個MV係對抗內心嘅過程,但我唔會忽略外界嘅聲音,我會更加勇敢去接受外界嘅聲音,希望大家可以繼續督促我哋!」

    點擊圖片放大
    +5
    +4

撰文 : TOPick柴犬出動