【第五波疫情】商台DJ麻利確診 從未接種疫苗現留家休息

娛樂 16:45 2022/02/21

分享:

分享:

本港的第五波疫情持續,商台也先後有DJ、播音員確診感染,包括廣播劇《十八樓C座》的「周老闆」金剛 、《公子會》節目主持劉翁,劉翁則於昨日(2月13日)於社交平台表示:「我全家中晒」。

而與鄭裕玲(Do姐)、余迪偉一同主持《口水多過浪花》的麻利(又名麻利亞)亦於今日(2月21日)下午於個人IG上載千字文,宣布染疫兼詳述自己的發病經過及各項病徵。

她稱自己「冇打過針、選擇用中藥、冇食過panadol、有調頻TimeWaver、病徵算明顯同好大幅度上落」,兼提醒「應付Omicron需要嘅係冷靜」、休息是相當重要。

最新影片推介:陶大宇專訪

麻利詳細分享各病徵 

麻利指自己比較認真對待每款病徵,以方便中醫理解狀況。第一,發冷、高燒:「個傍晚突然覺得啲骨好散,少少頭痛。」她表示本來打算行街及順道戴爸爸回家,幸最終打消此念頭,叫父親自行返家:

真係好好彩。晚上就精彩啦,好醒目十一點鐘上床瞓,跟住嚴重發冷,最正係房有暖風機,但凍到傻咗冇伸手去開機。發冷四小時轉為發高燒,當時未有探熱針,估計都好高溫,有諗過會唔會因此燒到變蠢。全身好痛,典型重感冒會有嘅皮膚、頭皮赤痛,非常之敏感地痛。又有另一個好彩係我買咗TimeWaver Home,突然間醒起,爬出房攞咗即刻run下frequency ,我想瞓得到咋唔係要即刻康復。好不容易捱到天光。

麻利稱,知道發燒是有功能,所以未有打算強迫自己需馬上退燒,她指探熱後的體溫徘徊38.5左右:「我中醫已經做咗好多case經驗豐富,個病啲起起落落大家大同小異。印象中人生有幾次重感冒都係咁辛苦。呢日冇記憶,冇食過嘢亦冇興趣、冇需要食。全日响張床度,冇沖涼冇洗面冇郁過。長期接力用timewaver home以及用醫療級吸氫氣機,有效快速放鬆瞓覺同埋減低嗰種感冒式頭痛。」

第二,發燒、冇胃口:「繼續低燒,頭痛、周身骨痛、皮膚痛。味覺得返苦味,但由於苦茶都好苦所以冇分別。唯一係好想食士多啤梨!仲有檸檬、橙等等,唔知點解。老母買來了熊本縣士多啤梨,我屋企有煉奶。味覺上係有層苦,但依然好味。一盤分兩次食(全日只係食咗呢個)夜晚突然有精神去沖涼好開心。」

點擊圖片放大
+3
+2

瞓醒後喉嚨超級痛

麻利續指自己再經歷「發燒、退燒、低燒、喉嚨痛」,她寫道:「一瞓醒全身汗,喉嚨超級痛。退燒就出到汗。但亦因為退燒,我都估到今日快速測試應該顯示positive(個個都係咁講)連日嚟成日俾人追問檢測結果,我覺得大家唔好迷戀一個檢測答案。有病嘅人要自己坦白面對身體有唔妥,而唔係望住一條線兩條線嚟決定做乜。仲有。就算你positive,醫生都係斷症下藥(in my case it’s 中醫)點發熱、點發冷、點痛,全部都有關,但同你「被法定乜乜機構話你陽性定陰性」無關。come on,醫病係醫個人唔係醫兩條線。」

麻利:病毒同細菌係兩件事

她提到有人建議發燒中的她出在外檢測:「自問冇力揸車,即係走去坐車?咁我點確保我冇傳染俾人嘅危險?去到呢度我覺得呢個病贏係贏在個腦。輸?輸在冇人肯用下腦。但我知,好多公司要求員工有官方證明確診先會唔扣假之類,搞到人人急住出街抵住病要排隊檢測,否則又話你曠工,呢啲公司、呢啲話事人,同香港一樣!病到忽咗!醒未呀大家!我亦都知道好多人唔留屋企係驚搞到屋企人。」

她續指:「其實要互相幫助、互相教育,知道病毒係一個咩概念。另外我又諗,如果你要强檢感冒,香港長期有大量人口處於感冒狀態㗎,呢刻我甚至反省點解要歌頌『病都返工』嘅同事?每種感冒都係病毒嚟,有病應該好返先出街係常識。原來係常識。病毒同細菌係兩件事,唔知到今日有幾多人分得清呢?」

「嚨俾𠝹刀𠝹傷咗咁痛」

麻利再於另一則Instagram帖文中分享情況,她透露自己經歷「好多痰、喉嚨痛」:「Omicron嘅喉嚨痛係你喉嚨俾𠝹刀𠝹傷咗咁痛,每吞一次口水就翻𠝹一次。係刀傷鋒利劇痛。終於有想食嘢嘅衝動,但只係衝動,因為好易攰。因為病毒品性濕寒,萬萬不能亂食嘢。例如餃子如果係白菜豬肉,有白菜死梗。我媽居然揾到韓國青瓜豬肉餃。但好難食🥲所以我都係煮快熟通心粉。下午又係瞓覺,嗰種一挨落床舒服即刻飄走嘅感覺相當良好。」

她提到:「半夢半醒之間我問Omicron其實你邊度嚟㗎?畫面係洛杉磯Santa Monica山火,我再問,呢個夜晚山火畫面係L.A.定澳洲?答案都係L.A.。莫名悲傷感覺,一定係本來有好多嘢住咗响自己棲息地,你冇燒到人渣都冇,佢唔使轉移或變種。蝴蝶效應不難理解吧。瞓醒覺再查下L.A.山火啲資料,諗起無數樹林、動物避無可避,樹林係地球個肺嚟㗎喎。唔好問點解嗰邊山火呢邊疫情,地球係一個波,任何人做任何嘢都係集體意識一部份,要你食返啲都冇計。」

點擊圖片放大
+6
+5

暫時仲有病徵

她稱自己暫時仍有病徵,所以不會浪費快速測試套裝,兼且有胃口但不見得有甚麼食物想吃。她分享:「我中醫話佢有同行响博覽館幫手但中招,中咗之後,作為中醫冇得揀用返中藥(?!)然後食飯係派咖喱雞或牛(??!!!)呢啲又多汁、辣、油淋淋嘅食物食到所有人咳到仆街又久病不好。我想知邊個高手負責安排呢啲嘢,有冇少少良心?病人喎?新冠喎?食咖喱?再一次感受到醫呢個病係用智慧,唔好講其他嘢。」

她寫道:「趁有精神消毒咗屋企,我知暫時消完毒又會俾本人污染。但我feel better抹乾淨啲嘢一次。然後又上床休息。兩邊鼻都全塞,咳到傻咗,用咗TimeWaver “breath of life”,即刻呼吸到同埋個人放鬆返,冇再咳,瞓到覺。」

「應付Omicron需要嘅係冷靜」

她以「過來人」身份分享建議:「應付Omicron需要嘅係冷靜,停止獵巫、Focus on自己同身邊人,唔一定要食好多嘢、聆聽自己需要,瞓覺、瞓覺、瞓覺、熱檸檬水,維他命B/C/D/Zinc」。

她稱自己會做隱士、專心養好身體,「因為我每次重病喉嚨都好弱會咳好耐,咳就講唔到嘢,所以暫時有咩都係會叫暫停先。大家都要保重身體啊啊啊。」

點擊圖片放大
+3
+2

商台即時安排清潔消毒

商台稱麻利的最後上班日期是2月14日,工作期間均有佩戴口罩。商台謂︰「以麻利亞最後上班日期起計七天,即2月20日,只要《口水多過浪花》之團隊完成快速測試為陰性,已屬安全,2月21日便可如常上班。」

而與她一同主持節目的同事,由事發起七天已進行自我家居隔離,每天盡量進行快速檢測,並且匯報檢測結果給公司。商台也已經即時安排清潔和消毒有關工作地點。

撰文 : TOPick柴犬出動