【雙喜臨門】吳浩康完婚感動爆喊 郭思琳學做好太太好媽媽

娛樂 19:08 2022/03/15

分享:

分享:

吳浩康今日完成婚禮。

吳浩康(Deep)與郭思琳(Margiela)日前宣布結婚,在今日(3月15日)下午正式註冊並舉行小型婚禮,婚禮上當然少不了「愛的宣言」。

Deep謂度了多個晚上,「都係圍繞住多謝佢願意嫁俾我、願意同我一齊去經歷我哋嘅人生、願意同我一齊去遮風擋雨。我哋各自對大家嘅承諾,就留番俾我哋兩夫妻啦,多謝大家嘅祝福、多謝大家嘅關心。」

Margiela則說:「佢同我結婚已經係一個承諾嚟,所以唔駛講我已經收到晒。」準備婚禮期間,亦發生不少 「蝦碌」事,Deep謂:「過程雖然好簡單,但係蝦碌嘢都多,因為而家啲速遞、運輸都受到影響,所以變咗我哋訂咗好多裝飾嘅嘢其實都好多冇嚟,最後我哋係喺山邊執樹枝,去完成個裝飾。」

由於疫情期間舉行婚禮,所以未能邀請太多親友出席,Deep表示一定會補辦婚宴,「但我哋想注咗冊先,所以今次唔好意思,請唔到好多嘅朋友嚟,亦都招呼唔到各位嘅傳媒朋友,所以多多見諒。」

正式註冊時,Deep跟Margiela更是喊唔停,Deep謂:「註冊好緊張,冇諗過咁緊張,都好多感動,特別係我自己見到自己爸爸喺度,其實我都冇乜點停過喊。」Margiela見Deep喊到決堤,自己都忍不住,「一見到佢喊我又忍唔住喊,佢太眼淺啦,我成日要安撫佢。」疫情下舉行婚禮,Deep坦言無論疫情與否,都是最難忘,「蝦碌百出,感謝太太嘅包容,雖然冇一個十全十美嘅婚禮,但亦都係疫情見證下嘅一個完美婚禮。」

問到Margiela婚後第一課,她笑說要「見識」婚姻的恐怖。「我覺得有太多嘢要去學習,尤其是要學做一個好嘅太太、好嘅媽媽,同埋我同你嘅相處啦,呢個係人生課題,太多嘢要學,因為我未經歷,我都係啱啱新婚,所以我暫時覺得我哋嘅相處係大前題,好多人都話結咗婚後係另一個境界,我都想快啲經歷吓睇吓有幾恐怖,哈哈。」

除了成為「人夫」, Deep亦快將成為爸爸,問到首胎是仔定女,Deep表示要保持神秘感暫不透露,但仔女都鍾意,「而家係專注喺第一個小朋友先,因為都係第一次做爸爸媽媽,所以有好多嘢都未知,好多情況要兼顧,所以我哋嘅焦點都係喺呢個BB度。」

Deep透露老闆楊受成博士會送大利是給BB:「其實收到老闆嘅祝福已經好開心啦,因為老闆真係睇住我成長,照顧咗我二十年,都係我半個爸爸,所以有自己咁尊敬嘅人嘅祝福,其實已經係好大嘅禮物。」

最新影片:Anson Lo訪問

撰文 : TOPick柴犬出動