【講你都唔信】曾志偉醉酒斷片被剝光豬瞓電梯口 「獎門人」一晚豪花十多萬元零印象

娛樂 14:33 2022/04/07

分享:

分享:

曾志偉親自上場講故,分享飲醉酒實錄。

TVB綜藝節目《講你都唔信》昨晚(4月6日)播出最後一集,「獎門人」曾志偉壓軸上陣,聯同C君、錢嘉樂組隊,決戰薛家燕、江美儀及阮兆祥,主持則由馮盈盈、江嘉敏、鄭衍峰、林秀怡及方紹聰(奶仔)擔任。

《講你都唔信》甫開始已笑料十足,趁着志偉、嘉樂轉做參賽者,一班新力軍即時變得嘴Gel Gel,林秀怡先搞笑地說:「第一集就係佢哋唔畀我講嘢,今集我就唔畀佢哋講嘢!」

但之後又馬上「笠水」說:「曾生唔好意思呀,頭先都係跟稿講咋!」志偉唔嬲不特止,更搞笑回應:「畀你哋得戚吓都好嘅,盡情享受吓,聽日炒得㗎喇!」非常爆笑。

《講你都唔信》昨晚播出最後一集。

C君知情識趣

到了講故事環節,江美儀打頭陣講兒時整蠱婆婆趣事,志偉聽畢自信十足說:「呢啲一定假!」

雖然嘉樂和C君都覺得故事是真的,但為了畀面志偉最終改估是假的,惜最終原來美儀所說的全是真實故事,志偉一隊痛失一分,創意十足的C君即爆金句幫總經理鋪好下台階:「我攞唔到呢一條題嗰一分,但我攞到總經理心裏面嗰一分!」

最新影片推介:After Class專訪

錢嘉樂爆邵氏禁忌

壓軸上陣的曾志偉及錢嘉樂,所講的故事相當有趣兼過癮。錢嘉樂大爆邵氏一位前輩真人真事,他先透露邵氏有三大禁忌,第一是換完衫後銀包、Call機要跟身,第二和第三是不能讓別人知道在哪裏睡覺,和去大小二便不能被人發現,否則隨時可能被整蠱。

嘉樂指某位前輩有次食完早餐去廁所大解時,被人整蠱潑水弄至全身濕透,幸好他認得兇手的鞋,便追出餐廳緝兇;當他發現兇手後,即拿出「自家製朱古力」拍落兇手面上,大家聽完都忍不住嘩了一聲!

    點擊圖片放大
    +7
    +6

曾志偉醉酒實錄

至於志偉則大爆自己飲醉酒斷片事跡,他透露自己最高紀錄試過斷片8小時,當日他出席洪金寶兒子洪天明的滿月宴,志偉透露當晚食完翅後的所有事情一概記不起,然後隔日有人打給他說:「志偉贏咁多錢,今晚請食飯啦!」他指當時覺得奇怪便打開銀包看看:「記得出去嗰時袋咗4,000蚊,一睇剩番400蚊!」

他之後打電話問其他人發生甚麼事,後來得知原來當晚自己賭錢贏了十多萬,他說:「之後叫晒酒樓啲伙計排兩排派錢,再同全場講聽者有份,去夜總會開咗兩間房係咁叫酒,咁都仲未夠,再去食日本嘢做宵夜,食完仲要打包,最後剩番400蚊!」只消一晚時間便花光十幾萬元,大家聽完都嘩嘩聲。

曾志偉自爆醉酒斷片實錄。

志偉說畢更感慨說:「我奉勸大家飲酒唔好太多,斷片最唔開心係咩?就係享受唔到個過程!」

他又大爆被明星足球隊整蠱趣聞,他指有次大家去其房間喝酒,由於志偉又例牌飲醉,故被友人剝光豬兼以床單包好放在酒店電梯口,志偉笑言直到第二朝清潔姐姐叫醒他才知自己畀人整蠱:「曾生曾生,好難睇呀,你圍住床單返房啦,啲人客就出嚟食早餐喇!」

撰文 : TOPick柴犬出動