【勸導狂】美其名為你好逼人遵從意見行事 曾智華:「勸導狂」天生覺得自己啱晒

親子 13:11 2022/04/25

分享:

分享:

美其名「為你好」,實質是強迫別人遵從自己意見行事。

呢個世界,乜人都有,其中有兩種比較惡哽,一為「控制狂」(Control Freak),另一為「勸導狂」(Advice Freak)。前者若是女友或老婆大人,算嘞,鬼叫你愛上佢,當然要犧牲;不過,如非有親密關係,但你成日「關心我」日常做乜,點解唔咁咁咁的話,真係會一腳伸開你㗎!

至於「勸導狂」,嘩,人數更多。佢哋天生覺得自己啱晒,本來無問題,我肥碌間中都以為自己係咁。不過,呢種感覺,你自己享受好嘞,千祈咪四圍逼人照閣下旨意做,美其名--我為你好。

小弟凡遇上呢類人,通常保持禮貌,唔會兜口兜面噴過去--老友,我都係為你好啫,不如我點你做乜就做乜好唔好?你知否乜叫尊重別人意願㗎?

最新影片:

今日突然抽起條筋,因自己決定短期去打第四針!

本欄讀者皆知,由零開始,我肥碌已在此公開支持疫苗計劃,一有得打立即打。

哈,竟然有啲多口友猛窒:「做乜支持林鄭?幾大都唔好打呀!仲有,打咗分分鐘中招㗎!為乜要做白老鼠?」

真係睬班友都傻,打唔打針乃經過詳盡分析,你哋為乜上綱上綫?關林鄭乜事?我只百分百關心自己健康及防禦力。

事實,醫療數據非常清晰,染疫死亡個案,長者為多,大部分未接種疫苗!再講,自己染,也可能散播出去!再說醫療科學,若無疫苗,肯定如今仍周街肺癆、麻瘋、小兒麻痺、天花、生蛇、肝硬化……

我不是「勸導狂」,唔會游說甚至逼人打,但也請你咪成日俾啲戇居advice我好唔好?!

原文刊於《經濟日報》收費專欄「肥碌出馬」,原題為「你advice我decide」

《香港經濟日報》TOPick新聞「第三屆全港小學生中文作文大賽」 立即參加︰https://bit.ly/3CrwGul

hket App已全面升級,TOPick為大家推出一系列親子、健康、娛樂、港聞及休閒生活資訊及Video。立即下載︰https://bit.ly/34FTtW9

TOPick推出「Band1學堂」,更多教育升學資訊︰https://bit.ly/3a6HT6T

【hket TV家庭台】《湊得輕鬆啲》逢周日早上10點伴你同行育兒路︰bit.ly/35z6COD

撰文 : 曾智華