【DSE2022】通識考生無溫政治題 網上祭祀及博物館科技試題藏「暗比」易中伏

社會 17:08 2022/04/28

分享:

分享:

中學文憑試(DSE)通識科今日(28日)開考。(梁偉榮攝)

中學文憑試(DSE)通識科今日(28日)開考,隨著公民科推出,明年將會是末屆文憑試通識科考試。有考生早料到今年不會出現「政治題」,完全沒有溫習有關課題,亦有考生認為非政治題會較易作答。試題涉及疫情、東奧及網上祭祀等大熱議題,考生感難度相若,但選答題藏有「暗比」要求,「易跌入陷阱」,有人更想中途轉題目。有教師指議題貼身、題型常見,難度相若,部分考生未能完成料與疫下少操卷有關。

政治題較難 考生:我唔係官 難多角度回答

今年是通識科被公民與社會發展科逐步取代的最後第2屆考試,政治題連續第2年絕迹。石硤尾考生盧同學形容今年「唔係特別難或特別易」,對於無「政治題」亦不感意外,「本黃色書(「今日香港」單元)都唔洗溫㗎啦,佢依家點會出政治題呀。」李同學則說,政治題算是較難處理,

無咁複雜,唔需要考慮政治問題,代入某某角色去睇政策,因為我又唔係政府官員,好難全面、多角度去講一件事。

她亦料不到必答題最後沒有出現代中國單元,「老師有tip三孩政策,雖然預咗唔出,但溫書嗰陣都唔知,所以都照溫咗先。」此外,她指第1題涉及青少年做義工較難,「疫情下學生好少去做義工,其餘兩樣(疫情下在家工作及東奧)都係呢幾年發生嘅嘢,比較清楚、有親身經歷。」而卷一整體較多試題要求按資料總括現象、特徵,比往年少出數據分析題,「如果有出起碼有3至4分,穩陣啲」。

至於卷二,李同學選答第2題博物館科技,惟題目問及「最有效方法」,「要諗個比較對象出嚟,好容易跌入陷阱」,她則列舉以文字講解或導遊,與科技呈現文物作比較。

盧同學則說,本身在「個人成長」單元「貼題」出人氣組合Mirror,講追星對個人正、負面影響,未料最終並無出現,結果他選擇第1題,回答網上祭祀的好處,「香港人忙於工作,唔得閒去祭祀,網上祭祀可以便利港人。疫情令好多人去唔到實體墓地,可以減少風險。」

黃同學亦指卷二第1題難理解,1b問及考生多大程度同意「在現代社會實踐中國傳統習俗時,環保因素應獲優先考慮」,他說睇題目「睇到好迷」,「框死咗對『香港社會』的影響,無咁多角度」,

一開始覺得好有信心,寫到一半覺得有啲迷惘,諗係咪應該繼續寫落去,要唔要換過題。

明年末屆通識科考試 考生指內容廣泛適合學生

對於明年將會是末屆通識科文憑試,何同學說,「讀咗好多年,突然轉新科目,可能會好唔適應,對佢哋(師弟妹)唔公平。」盧同學則說,「聽師弟講新嘅公社科第一課都係講基本法,通識係好嘅,有6個單元幾適合我哋,好廣泛。」他又形容考完主科未有感到特別開心,

有啲失落,過咗3年好似咩活動都無,突然間考文憑試,無喺中學製造回憶,好多活動都取消咗,見到大家準備畢業,有啲遺憾。

廠商會中學通識科主任馮凱玲表示,今年試卷題型恆常出現,她指教師亦不會避忌有關政治內容,「法治、政制始終是課程一部分,所有教學都有涉獵,無特別強調學生洗唔洗溫。」至於未來會否出題「無人會知」,「我哋會繼續教今日香港,法治政制部分,唔會避忌。」而今次試題另涉今日香港單元中的生活素質及身份認同等內容,

我覺得已考核到呢個單元嘅重要項目,所以唔會詫異。

同校另一通識科主任張素貞表示,相比去年有一整題關於中國太陽能的必答題,涉及「現代中國」單元,今年則未見獨立題目針對該單元,惟她未感詫異,指通識科有6大單元,並非全部「一定會出」,而該單元今年只在卷二故宮博物館題目有所涉獵。

張認為整體試卷難度與往年相若,必答題有2題「立場題」,比去年多1題;選答題首兩題分題b,提問用語均提示考生要作暗比,要求第3題的一般比較題為高,故考生需特別留意,但都不是新問法。馮則指,在其試場觀察到有三分一考生未及完成必答題,相信與學生疫情下少操卷有關。

《香港經濟日報》TOPick新聞「第三屆全港小學生中文作文大賽」
立即參加:https://bit.ly/3CrwGul

政府派發電子消費券 一文看清最新商場商戶優惠:https://bit.ly/3xdMkJc

HKET APP健康台更多都市疾病影片:https://bit.ly/3cNFwr7

hket App已全面升級,TOPick為大家推出一系列親子、健康、娛樂、港聞及休閒生活資訊及Video 立即下載:https://bit.ly/34FTtW9

記者:馮琪雅