關心妍預告囡囡做個唱嘉賓 老公變「衛生組組長」上台消毒

娛樂 17:00 2022/05/23

分享:

分享:

關心妍為唱唱綵排。

關心妍演唱會舉行在即,近日緊密為個唱綵排,這日她現身Band房作最後準備。Jade表示已準備就緒,但騷期迫近難免緊張。

Jade表示:「因為時間不多,所以綵排唔係好多次,唯有次次排歌都當開騷咁做,真係好刺激啊!而囡囡上台表演呢一Part終於有啲眉目,因為我搵朋友借咗啲瑜珈墊,咁就可以完成佢嘅夢想上台打筋抖。」

近日Fans不停網上留言估嘉賓,更提議不同的歌曲點唱,Jade話難滿足大家:「嘉賓唔會太多,總之有男有女啦,因為我都想爭翻成個騷自己唱。依家Fans都成日網上點唱,我估到時佢地都會喺位度嗌出嚟,但係我都會盡量睇時間,唔會比個騷超時嘅,因為唔係好多錢㗎咋,唔好搞到主辦比人罰錢啦 。」

雖然疫情緩和,但關心妍仍不敢掉以輕心,用最高防疫規格作準備:「因為我地要對觀眾負責,依家真係好驚自己病,所以都謝絕晒所有探班、打氣,而老公每日都會去我所到之處消毒、擺晒消毒機,所以佢係呢個騷嘅衛生組組長,有佢喺度我都好放心。」

最新影片:余德丞訪問

撰文 : TOPick柴犬出動