【娛圈喜事】郭思琳預產期9月 吳浩康答應陪太太入產房

娛樂 12:09 2022/06/09

分享:

分享:

吳浩康9月升呢爸爸。

日前吳浩康(Deep)到ViuTV錄影《Chill Club》,初次與樂隊Yusobeit夾band,久未夾band的Deep當知道要與Yusobeit合作一集專場,表示十分興奮。

他說:「以前同人合作會問『點解』,而家同人合作都會問點解,不過係『點解唔試試合作』。個世界變得好快,可能有好多好嘢係我哋身邊擦身而過冇留意到,既然係咁,不如放膽去做多啲唔同嘅合作,可能會有驚喜。」錄影期間,雖然現場冷氣充足,Deep與Yusobeit都錄到身水身汗,返到後台謂:「錄到底褲都濕埋呀,好正好熱血,成個人㷫晒。」

錄影新歌。

Yusobeit 四位成員分別是主音Elvis、結他手Kit、低音結他手Andy及鼓手MC,當中Andy更是身兼父親、老公及band友三個身份。

將為人父的Deep便即時向Andy取經,「因為佢始終都係經驗豐富過我,最起碼嘅交流就係,佢自己有份工、又夾band、仲有個家庭,大家溝通一吓當中嘅苦與樂,點樣協調太太同自己嘅生活。」

與Yusobeit合作。

提到太太郭思琳預產期是9月,Deep表示會陪伴太太入產房兼剪臍帶,「而家心情係未去到嗰一秒都未係太緊張,而家主要都係陪伴住太太先。」而早前郭思琳差點暈倒街頭,幸好Deep當時在身邊,「而家都盡量少啲俾佢一個人出街,因為佢都陀得個肚好大,同埋條腰真係好攰好攰,出街可免則免。」

至於工作方面,Deep表示:「而家會停一停手頭上嘅音樂項目,好好考慮一下到底係重組樂隊作新歌?定係收歌返嚟做新歌?呢幾日同Yusobeit交流,好大衝擊,想夾返band嘅慾望好大。」

最新影片:林凱恩訪問

撰文 : TOPick柴犬出動