【馮允謙音樂會】張敬軒尾場送上珍貴手錶 寄語Jay珍惜時間

娛樂 16:36 2022/07/06

分享:

分享:

張敬軒於尾場現身。

馮允謙(Jay)四場《Have a JAY Time 2022 演唱會》,昨晚在StarHall圓滿落幕。尾場表演嘉賓張敬軒,與Jay台上交換禮物,大玩食字,引爆連場笑聲。

昨晚好友許廷鏗、王灝兒(JW)、陳健安、梁釗峰、Nowhere Boys主音陳維諾(Van)、RubberBand鼓手泥鯭和Mirror的柳應廷(Jer)等捧場,觀眾席上嗌Encore超興奮。

演唱會尾聲,全場突然一齊高舉「下次紅館見」手幅大合唱《山旮旯》,場面壯觀,Jay非常感動,承諾盡力盡快踏上紅館舞台。

向jJay Fung送上手錶。

早前Jay擔任軒仔紅館個唱嘉賓時,送他兩張手繪門票,昨晚軒仔上台與他合唱《愛斯基摩人之吻》後,笑言未能憑票入場。而軒仔送他一份很有紀念價值的禮物,軒仔邊除丟手表邊說:「2008年我首次踏足紅館,之後出糧,人生第一次收到咁大份收入,所以買咗一隻好出名嘅手表送畀自己,今晚我決定送呢隻手表畀你。

Jay不敢相信,軒仔親自為他戴上,說:「希望你唔好介意係二手,呢隻手表陪伴我開過好多演唱會,每次綵排都會戴住佢,當時有一段好長嘅時候,呢隻手表係我人生最貴嘅手表。」他語重深長:「希望藉著呢隻手表話你知,我哋呢行好現實,長江後浪推前浪,珍惜時間,把握機會,我哋紅館見!」Jay感動得攬實軒仔,說:「我一定會加油!」

Jay感觸落淚。

Jay自言回禮不及其手表珍貴,軒仔笑說:「封返封老毛畀我得啦!」Jay不明白,軒仔笑說:「即係利是,真係廣東話黑洞!」Jay送上一個金色的球體,軒仔笑說:「呢個形狀好引人遐想喎!」Jay解說:「好似一粒栗子,好得意。搖吓有聲, 佢有個啷啷架!(依家我無啷啷咩?)」全場爆笑。

Jay忍笑續說:「係Church Bell,啲聲係咪好舒服呢?」軒仔說:「你好舒服咩?我通常揸住呢啲嘢喺手唔係好舒服,人哋揸就唔知!」Jay笑到接不上咀,軒仔說:「你自己中文唔好,做乜搞呢啲gag呢?!」

Jay返後台換衫,軒仔在台上讚他是充滿正能量的樂觀男孩,就算被欺負亦會替對方找籍口,並原諒對方。笑言在自己的歌曲中,終於找到Jay討厭的東西,他說:「我呢首歌叫做《JayFung憎的孩子》(《追風箏的孩子》)!」軒仔還將歌詞「追風」刻意唱成「JayFung」,觀眾爆笑。

最新影片:

撰文 : TOPick柴犬出動