黃凱妮林德信推出英文歌《These Nights》 Alex被讚性格慢熱好男人

娛樂 15:28 2022/07/08

分享:

分享:

黃凱妮和林德信合作新歌《These Nights》。

歌手黃凱妮(Shimica)和林德信(Alex)於昨晚(7月7日)推出新歌加MV《These Nights》。今次新歌由Shimica和Alex合力填詞,並由Shimica作曲。

Shimica指寫這首歌時剛跟前男友分手:「嗰陣時同男朋友分咗手,但係我哋個關係又唔可以完全斷絕,當時晚晚都失眠,所以就寫咗呢一首歌 《 These Nights 》」

《These Nights》MV

Alex性格慢熱

Shimica表示, 本來此歌本來構思由個人主唱:「但係諗諗吓,其實畀男仔去表達自己嘅諗法都好,所以就搵咗Alex Lam ,覺得佢幾有型,又幾bad boy vibe,同埋都覺得佢好適合做呢首英文歌,咁當其時我問Alex個陣佢諗都冇諗就應承上嚟我屋企一齊錄歌。(佢出名乖仔,點解覺得佢似壞男孩?) 除咗佢玩yoga外,我真係唔知啲人覺得佢乖仔,哈哈。」
 
對於被Shimica覺得似Bad boy,Alex笑指可能自己平時比較慢熱、內向,但一有音樂表演,尤其是自己喜歡的歌就會比較放:「我都好期待將來我哋有live表演,因為呢首新歌係好啱唱現場,唔係一般要自己聽歌、再去思考,係比較啱啲多人一齊玩嘅環境。」
 
Alex透露跟Shimica在Instagram上認識,私信了幾次後便已經到她的家錄歌,「佢send咗呢首歌畀我,我都非常鍾意,真係諗都冇乜點諗,佢問我可唔可以唱呢首歌,因為本身已經好鍾意佢,所以好快就say Yes。」

他指跟Shimica個性甚為不同,但出奇地有火花,「佢係一個好熱情、好high energy嘅人,我自己就比較Chill同low energy,不過唔知點解我哋一齊做音樂時,好夾、好快、好順利,好明大家想做乜嘢,所以呢首歌好快幾次就錄完,不過就因為疫情,所以依家先完成到呢個MV。」

Shimica出新歌感恩
 
Shimica亦表示,十分慶幸終於可出到這首歌及MV:「我都3年冇做過喇,因為失聲關係,唔計Rap,我3年都唱唔到歌,依家醫生話我可以唱返歌,我想好似當初《狂舞吧》咁樣唱歌俾大家聽。」
 
問到失聲3年原因,Shimica坦言是因以前夾band,沒有錢去買耳機去保護自己的耳仔和聲線:「因為聽唔到自己唱歌,所以就唱得好大聲,不停大嗌,直到有一次感覺到喉嚨好痛,之後發現喉嚨有少少血,醫生話我喉嚨起繭。」

醫生指做手術的復原時間很長,而且要重新將聲線訓練:「醫生話一係就唔好唱住,慢慢等把聲自然好,所以就揀咗自然好,因為擔心割咗啲繭,萬一有咩事唱唔返歌點算,同埋都幾鍾意我磁性呢把聲,因為生繭之前係冇嘅,所以都驚割咗啲繭後會冇咗把磁性聲,都幾矛盾。」
 
《These Nights》是首全英文歌,問到現今大趨勢是做普通話歌,為何反其道而行,Shimica則認為香港音樂市場已開始國際化:「我覺得英文歌依家都越來越多人做,例如 AGA , Janice , Jill , Gareth T, Tyson Yoshi 等等歌手。同埋香港其實有好多人鍾意唱英文歌㗎,所以都好希望香港第日可以多一個項目,就係英文歌曲嘅頒獎典禮。」
 
這首歌是Shimica首次自己造一首歌邀請其他歌手去feature,她透露即將有很多solo的歌推出,「今年年尾會出大碟,同埋都想多元化啲會同唔同國籍嘅人合作。」

最新影片推介:

撰文 : TOPick柴犬出動