阿Phat+JBS辦本地首屆Hip Hop頒獎禮 《Whats Good Music Awards》下月舉行

娛樂 15:29 2022/07/14

分享:

分享:

由組合LMF成員阿Phat、廿四味成員JBS、Hip Hop廠牌Greytone Music創辦人Keni及音樂製作人阿Bert牽頭,於8月6日在香港會議展覽中心Hall 5BC,舉辦首屆Hip Hop樂壇頒獎禮《Whats Good Music Awards 2022》。

最新影片推介:戴耀明專訪

四出邀請本地Rapper

是次頒獎禮源於阿Phat的一個夢想:「十幾年前,我喺TVB嘅訪問講過,我想有呢件事發生,有網民Cap番落嚟,我就講:『我係真㗎,阿梅!』我唔係想廿四味攞獎。而係進步又好、係文化互通又好,主流都可以聽吓其他嘢,open-mind啲,會令到叫做香港呢個文化沙漠,有少少水份、少少氧份,唔好淨係得一款嘢。」

身為好友的JBS,一直把阿Phat的夢想緊記心中,直到最近他們在自家YouTube頻道「24/7TALK」,訪問本地Rapper Akiko,JBS說:「佢話原來每間中學都有Rapper,跟住就叮一聲,係時候搞啦,跟住Keni聽到,覺得如果你兩個搞或者廿四味搞會好啲,因為我哋比較耐同埋身份中性啲,於是就搵埋 阿Bert傾,大家都想搞,要搞就要搞個最實至名歸、最公平公正嘅頒獎禮。」

JBS透露正式籌備頒獎禮前,特意找來同屬本土Hip Hop界殿堂級的阿庭、大飛及MC仁:「佢哋都覺得係時候搞,總之我哋搞佢哋撐,已經係一枝好大嘅強心針。」

阿Phat四出邀請現時活躍的本地Rapper參加,反應比他預期更好:「大家都希望見到呢件事發生,所以將個人主義放低,想有件事話畀全世界喺外國嘅人聽,講廣東話又好,其他語言又好,香港唔止係投機炒賣嘅地方,香港仲有Hip Hop。」

(左起)阿Bert、Keni、JBS、阿Phat

香港Hip Hop圈規模小

談到香港Rapper現時的水平,阿Phat指香港的規模較外國少,他打趣比喻外國的Hip Hop圈是「海洋公園」,香港暫時仍然是「自己屋企嘅後花園」:「啲花都種得都好靚、養啲魚都好靚,不過我哋就細啲,有機會下一步就花園街咁長,有機會下一步就再大啲。」

JBS強調香港Hip Hop的規模雖然細,但技巧已經是水平以上:「始終每個地方嘅文化,如果您可以用廣東話寫首Rap,其實已經好勁,因為廣東話九個音,寫4分鐘嘅Rap,一啲都唔容易。」

對於主流樂壇多年來,未有加入Hip Hop類型,JBS直言大公司未有提供機會:「大公司唔肯開門,我哋就自己創造個機會,都希望咗十幾年,唔等啦。」走入主流,是否代表要參與主流的遊戲?Keni即表示:「如果你有型,你去邊都係型,如果你X嘅話,你點都係X。」身旁的JBS甚為支持,他更澄清不代表indie、Hip Hop好型、好勁,直言「好多都係垃圾」,正如流行曲亦不等同爛歌,很多亦是佳作。

回到頒獎禮的意義,除了是實現阿Phat的夢想,4位主創更渴望建立本土Hip Hop平台,讓Hip Hop界藝人得到更多機會。

他們強調是次頒獎禮有延續性,阿Bert說:「頒獎典禮就令有能力嘅Rapper得到注視,之後我哋可能會搞音樂節,甚至推薦佢參加海外音樂節,又或者邀請海外Rapper合作,聯繫住成個社群係最緊要。」

阿Phat更直言下一個計劃就是做「廣東話Hip Hop十大歌曲榜」,讓樂迷自己投票自己鐘意的歌曲 , 亦令外界認識更多本地藝人及作品。

    點擊圖片放大
    +4
    +3

《Whats Good Music Awards 音樂頒獎典禮2022》
日期:2022年8月6日(星期六)
時間:晚上7時正開始
地點:香港會議展覽中心Hall5BC
購票網站:HKTicketing.com

撰文 : TOPick柴犬出動