【MIRROR演唱會】12子放下偶包拍MV 借新歌《WE ARE》感謝鏡粉一直支持【多圖】

娛樂 10:57 2022/07/23

分享:

分享:

人氣組合MIRROR一連12場《MIRROR.WE.ARE LIVE CONCERT 2022》將於下星期一(7月25日)舉行,演唱會演出在即,MIRROR順勢推出演唱會主題曲《WE ARE》 。在新歌MV內,可見MIRROR 12子零偶包玩到癲,懶理已可預見的大量黑圖湧現。

MIRROR成軍3年多來,由《全民造星》到首度踏上紅館舞台,除12子努力不懈外, 鏡粉一直對他們的不離不棄、力撐支持亦絕不可少。

    點擊圖片放大
    +3
    +2

放下偶包聯手製笑料

今次新歌《WE ARE》,MIRROR透過歌聲,感謝每一位粉絲外,亦約定不論在開心戀愛、寂寞害怕之時,只要有需要,MIRROR都會一定陪伴在側,與大家一起走過高低起跌。

MIRROR視《WE ARE》為入場睇演唱會前給粉絲的熱身作,副隊長江𤒹生(Anson Kong,AK)分享道:「呢首主題曲係比較開心啲,希望大家入場睇嘅Fans同埋觀眾都能夠感受我哋嘅正能量。編舞方面,Rock Sir特別編咗一段比較Signature嘅舞蹈,唔算好難,希望大家可以跟住一齊跳,一齊開心!」

歌曲題材夠溫馨又滿滿的正能量,但MV內MIRROR眾人側放低偶包,聯手炮製笑料十足的畫面。

楊樂文(Lokman)道:「我哋係銀河宇宙守護隊,保衛宇宙和平,但宇宙已經和平咗好耐,所以我哋有工返等於冇工返,因為太無聊,大家就搵嘢做。」

而身為MIRROR隊長的他在守護隊內亦繼續其隊長角色,並介紹道:「我係好認真、正義凜然嘅隊長,雖然冇嘢做但都會督促隊員做嘢,最後就真係有嘢做喇!」

    點擊圖片放大
    +12
    +11

加入周星馳元素

這班銀河宇宙守護隊隊員的任務,就是要保衛地球,而王智德(Alton)則在隊中負上重責!他說:「今次遇到嘅隕石問題,係可以透過《石破天驚勁舞拳》呢本秘笈得到答案,而我係帶領大家拯救地球!」

聽似非常認真的拯救故事,但實情是MIRROR人人都發揮其搞笑細胞,在MV中大放笑彈。Alton續道:「以往會放低偶包拍攝嘅MV有《Ignited》或《All In One》裡面扮鬼臉一幕。

而拍攝《WE ARE》時同導演溝通,想今次有啲周星馳嘅舞步,起初做出嚟都太似跳舞,導演想睇落唔似舞步嘅步法,咁先俾大家睇到亂舞嘅MIRROR俾大家睇,所以喺現場就度咗一啲發癲、發狂、發喪嘅舞姿,都幾有Feel!」

若有欣賞過《Boss》MV,都應該記得呂爵安(Edan)與柳應廷(Jer)相映成趣的搞笑功力,今次他們又再合體,並親自度出瘋狂絕妙的搞笑場口。

Edan笑道:「《WE ARE》MV都好適合我哋,繼上次《Boss》之後又再搵我同Jer玩。」Jer也說:「導演一嚟到就話,喂!好掛住你哋兩個孖寶呀!今日都係整返個孖寶先啦!」

對於自己度的笑料,Edan亦很滿意,並說:「我哋創作咗好多Scene,真係創作力量同幻想,會嚇你一跳。」要搞笑,免不了要放低偶包,型格全清,換來的是醜化自己的畫面,但分分鐘會成為製作黑圖的最佳材料。

    點擊圖片放大
    +8
    +7

教主不介意黑圖

不過盧瀚霆(Anson Lo)一聽到即表示:「黑圖?完全唔介意,因為平時都大把黑圖!」姜濤也說:「我哋平時都會Post大家嘅黑圖。」Anson Lo也認同,更說:「就算我哋以往嘅MV,睇落冇黑圖,但其實喺某啲位嘅0.1秒突然pause,我哋啲跳舞樣都會變咗黑圖。」

姜濤即想起自己的「傑作」,指著Anson Lo笑言:「最終極係我Post你演唱會嗰張,屍骨分離。」Anson Lo回想起也大笑說:「所以我哋已經慣咗,呢個係我哋嘅傳統,有別於對上幾次偏向型格男團風嘅團歌。」

雖說放低偶包,但姜仍大讚Anson Lo,叫大家留意MV當中細節,說:「今次係第一次大家都咁癲,《Ignited》、《Boss》都冇咁瘋狂,不過呢個MV最勁係Anson Lo個頭點揈個蔭都唔會郁!」Anson Lo聽罷也自豪道:「我係Spray王,ok?!」

Frankie及Jer最好笑

今次MIRROR眾人埋位都參與了小創作,令笑料貫穿全MV,被問到當中誰最高笑,結果陳瑞輝(Frankie)及Jer都大熱當選,Lokman解釋選Frankie原因道:「皮皮平日係一嘢就中,但佢今日好高功,嘢嘢都中,今日算爆燈!」

Frankie聽到讚賞,即謙虛道:「我不嬲都唔覺,你哋開心,我就開心。」Jer當選,但Edan卻酸言,說:「佢今日懶特別,著單邊,我哋11個都著成件,結果犯連戲問題。」Jer即扁咀回應:「花姐話OK嘅。」二人一唱一和,繼續發揮他們的搞笑本色。

至於Alton見大家談得興起,即笑言自己都落力搞笑,想盡最後一分力拉票,陳卓賢(Ian)聽見,即起哄道:「佢想要票,俾晒佢喇!」

而向來都屬文靜派的Jeremy跟Tiger,均表示已盡力搞笑。忍笑方面,眾人不敢認叻,但身為隊長的Lokman都大讚各隊友,說:「大家都幾叻,今日大家都好高功,但冇爆蟹情況出現,大家都有一個非常專業嘅演出,俾啲掌聲自己。」

    點擊圖片放大
    +12
    +11

演唱會溫馨提示

《MIRROR.WE.ARE LIVE CONCERT 2022》下星期一便舉行,MIRROR除推出新作外,亦不忘提提大家入場備忘,Lokman率先提醒:「背好晒歌詞,聽多幾次我哋嘅歌,順手撐一下Hit Rate。」

AK並溫馨提示:「帶多個口罩,因為跟住我哋跳舞會濕晒,另外我哋勁歌熱舞跳到濕晒呢,大家都會好興奮,都會出晒汗跟住濕晒喇,所以要帶定毛巾抹汗。」李駿傑(Jeremy)提大家要帶飛,Ian則道:「去定Toilet,因為冇廁所位。」AK聽到即強調:「特別唔好揀佢唱時去廁所呀!」

最新影片推介:

撰文 : TOPick柴犬出動