【有個閨密叫祖藍】楊千嬅解釋移居上海真正原因 強調與丈夫並非一見鍾情

娛樂 14:00 2022/08/25

分享:

分享:

本星期日播出的第5集《有個閨密叫祖藍》由楊千嬅任嘉賓!在節目中,當千嬅抽出首項任務後,即「反客為主」拋製作組謂:「開多條!唔好畀我發現你張張紙一樣!」結果千嬅果然料事如神,先贏頭威。

之後二人獲安排打羽毛球,為了增加趣味性,球賽分為「獎門人版」及「教練教路變放水版」;由於祖藍自稱「零運動」,千嬅原本志在必勝,可惜最終多番被技術式擊倒,氣得她出動「聲殺」擾亂祖藍:「等我Give you colour see」、「我未warm up啫」、「你呢啲波咪害人害己咯」。

玩《超級無敵羽毛球》時,千嬅又女教官上身狙擊祖藍:「你講嘅係你冧個女,題目應該係個女冧你喎,你呢度亂咗!」

最新影片推介:洪嘉豪+MC張天賦專訪

千嬅指老公「遮得好」

千嬅大爆老公是「運動魔人」,即使只是上綜藝節目也當正「真‧比賽」:「有次佢特登train咗三個月先去拍,我提咗佢十次呢個係節目、你只係演員,佢就話自己係運動員。」千嬅說到此處即笑指自己冇嫁錯人:「整整吓佢搞到我都覺得自己係運動員,跟住就唔肯認輸喇,但有次我出咗意外,鬥牛成個飛起咗,就輪到丁生話番我只係演員。」

談到祖藍讚丁子高身型弗,千嬅又指老公身形冇祖藍想像咁弗:「佢遮得好咋,話佢Perfect figure又唔係。(你都冇咁嘅需要啦)我又冇要求佢,但最好唔好咁走樣啦。」

愈講愈興奮的千嬅,笑指丁子高經常唔「識撈」,令她哭笑不得:「好似一齊做音樂節目,佢會走嚟話你個音要拉番長少少,跟住我就feel到自己個丹田有火」、「第一日約人飲嘢,通常唔會將人哋所有缺點講晒出嚟呀嘛,但佢就話:『你啲衣著配搭有少少問題,如果我喺客嘅角度會有啲考慮。』」

    點擊圖片放大
    +4
    +3

公開移居上海原因

千嬅強調與老公並非一見鍾情,只是愈相處愈發覺自己深受對方影響,並謂現時在上海居住也是因為老公的上海人身份:「當初嚟係因為佢好耐冇見屋企人,佢屋企大家族嚟,每次食飯都成三圍枱。但我爸爸媽媽喺香港,所以都會掛住香港。」

祖藍追問千嬅曾否行奶奶政策,千嬅分享與奶奶打牌趣事:「打牌我識識地,但又唔係好識,因為數學真係相當差。初初打我好驚架,奶奶好認真,唔可以亂打。譬如人哋做大牌,但我又唔知亂咁打,結果打出去畀個雞糊截咗人哋一舖150幾番,真係驚過輸架。」

    點擊圖片放大
    +5
    +4

撰文 : TOPick柴犬出動