【塌樹意外】何文田塌樹壓中校巴反思城市綠化 樹根被封像膠袋笠頭禁呼吸

親子 17:25 2022/09/20

分享:

分享:

何文田日前有大樹倒塌壓毀四輛車,造成3人受傷。(馬路的事(即時交通資訊台)fb圖片)

「睇到巴富街嗰棵鳳凰木無端端就咁冧落嚟,好彩當時無細路仔喺架校巴,又好彩棵樹跌前少少,只係打爛校巴擋風玻璃,司機受輕傷,否則後果不堪設想。」

好事之徒在損友吹水群組,分享了巴富街鳳凰木倒冧片段:「唔好話我事後孔明,市區綠化,周圍都種幾棵樹,但係又用石屎封住佢嘅樹根,個情況就好似搵個膠袋笠住一個人個頭,唔俾佢呼吸一樣,感覺到棵樹直不甩企咗喺石屎森林中間,看似綠化環境,其實嗰棵樹窒息緊,不過無人理會,總之市容夠靚就得,樹死樹還在!倒冧一棵,枯萎一棵,仲有千千萬萬棵樹,話之佢。冧樹只係意外,唔係常態就得㗎喇!」

【塌樹意外】何文田塌樹意外壓中校巴 閉路電視拍到樹木突連根拔起

「事發之後,行過有樹木嘅行人路,記得要兜路走,君子不立危牆之下,亦不行危樹之路。」損友甲溫馨提示。

「其實負責嘅部門有無諗過咩樹木適合咩地區種植㗎?」損友乙問:「定係抱住唔理好醜,最緊要就手嘅心態?有地種樹,見樹封根,只求外觀,不問健康。」

「次次冧樹,見到班官嘅反應,令我諗起電視台報天氣嗰位卡通版天氣先生。」好事之徒說:「佢咯咯咯行出嚟,見到好大一個太陽,『呀!』一聲,表示好曬,然後一嚿雲飄出嚟遮住太陽,佢又『噢!』一聲,表示少許失望,若無其事咁,又咯咯咯出鏡。」好事之徒的形容有點牽強,但抵死。

最新影片推介︰

原文刊登於《香港經濟日報》,標題為「樹死樹還在

【名師試題教室】睇片連工作紙  中英數必學單元︰https://bit.ly/3sEeM3Q

hket App已全面升級,TOPick為大家推出一系列親子、健康、娛樂、港聞及休閒生活資訊及Video。立即下載︰https://bit.ly/34FTtW9

TOPick推出「Band1學堂」,更多教育升學資訊︰https://bit.ly/3a6HT6T
 

撰文 : 鄭丹瑞