【分身家】30+港男勤力顧家孝順父母 爸爸將房子轉名細佬:有樓唔好爭

親子 10:00 2022/10/01

分享:

分享:

爸爸將房子轉名給小兒子,引發大兒子夫婦關係欠佳。

羅師兄一向認為造成以及解決家庭問題,最大的因素,在於金錢。或者你會說「羅師兄,你太銅臭啦,親情點可以用金錢去衡量或者取代呢?」抱歉,要是你真的這樣認為,我只好告訴你,現今社會又或是在我面對過的案例中,親情如同人情有時真的薄過紙,要是你跟家人關係很好,互助互愛,這實在是你的福氣,要多加珍惜。今天我要分享的這位L先生,我相信親情對他來說,是人生的一道坎,縱然你告訴他出口在那裡,他也走不出去,是的,就多少也是天命。

L先生,身高略胖眼小唇厚,三十多歲,跟太太育有一子一女,建築行業中層,數年前購入二手樓上車,收入扣除一家開支以及供樓後,還得要照顧兩邊老人家,已是所餘無幾,大時大節也實在吃力。就如L先生所謂,最怕有病又或是被炒,無疑香港就是一個這樣壓力大的地方。

最新影片推介:

八字離婚點睇

L先生: 「最近我同太太吵大鑊,我想知我會唔會離婚呢?」

羅比: 「你八字妻星入妻宮,大運同原局都無沖無破,仲要係用神,理論上老婆幾好個喎,不過出年卯年沖夫婦宮用神,的確要注意一下(夫婦宮為酉)。但重點係你比劫同印星都好旺,有時真係唔好太主觀喎,可以嘅話有時聽下老婆講啦。」

L先生: 「我都已經算好聽我老婆話喇,不過我底線係唔好影響我同我屋企人既關係。(你屋企人?你老婆都算係個喎。)最近因為我老婆就我阿爸對遺產分配既問題有意見,我夾咗喺中間,唔通話我阿爸咩,咪同老婆嘈左幾句咯。」

羅比: 「因咩事呢?」

L先生: 「我阿爸一直都好錫細佬,佢直頭有D縱壞佢既情況,我出黎社會時細佬仲讀緊書,屋企好多開支係我負責。然後儲錢買樓,都係兩公婆儲蓄,都唔敢問阿爸阿媽。但係阿爸近年身體唔好,佢見細佬又唔係好掂,同前妻生左個女,依家成日做散工,所以決定將層樓轉佢名,話我同老婆都有樓,收入又穩定,就唔好同細佬爭。但係阿爸阿媽就係好錫佢同埋佢個女,我個兩個,就成日搵位話佢地……我老婆有晚抵唔住頸,同佢兩老嘈大交,我當下以大局為重,無幫到老婆,仲話當面話佢好介入我地既家事……」

羅比: 「咁你依家係同老婆冷戰緊?瞓緊廳定廁所?定同工人姐姐瞓?哈哈……(L先生係我多年朋友,所以開個玩笑等佢唔好咁內疚啦)」

L先生: 「咪玩啦大師(澄清,我只敢當師兄)......依家係外父外母屋企瞓緊,老婆話想同我離婚,佢外家呢次出面保我,我真係好感動。我承認,老婆忍左我好多次,我細佬娶老婆既禮金,以至到佢部車,我都有借錢俾佢,一分錢無還過。我爸媽仲幫住佢,更唔好講我一直都有俾佢地(爸媽)家用,佢地個邊屋企壞電器都入我數。但我就係唔知點解,對住阿爸同細佬佢地,真係硬唔下心腸,總覺得自己做阿哥付出係應份既,可能自細阿爸好權威,又或者我真係前世欠左佢地。」

八字中點睇原生家庭帶來煩惱

羅比: 「呢點我都部份同意既,人與人之間既關係,好難做到好平衡,總會有一方付出多D,或者呢個就係所謂既家人債。你月柱干支都係印星,好易係媽寶男,自細就好依賴爸媽幫你做決定,但係月柱又係忌神,所以父母同兄弟(比劫)都容易令你破財同帶黎煩惱。老實講,我唔鍾意介入人家事太多,但長此下去,對你自己家庭相當不利。不如你同太太商討下,點樣解決好 D啦。」

L先生: 「咁命理上有咩方法可以幫到我呢個情況呢?」

羅比: 「第一當然係唔好同住啦,但唔係叫你唔孝順父母啊,兩回事。第二係唔好再借錢俾細佬喇,一黎你個局散財就易,等人還錢就難喇。另一方面,你咁助長佢依賴性,長久係害人亦害己啊。第三,你三十幾歲,有時都要有自己既立場,尊重父母既同時,太太都一樣要尊重,甚至你既小朋友……唔好丙咁一意孤行喇,好男人同好老公係有分別架!至於穿戴上,左手戴黃晶啦,黃虎眼石啦,唔會太貴。另外,做多D運動,咁樣對你運程同思考都有幫助。」

L先生聽了後,當晚買了紮花回家道歉,之後好像得到太太原諒,至於他父母和弟弟方面,還未有新消息更新。(羅師兄能得到他的允許寫這篇文章,大家想必也明白箇中原因。我還是多少介入了,但做這行也是難免的,用心行善自己知就是了。)

羅師兄認為,錢並非萬惡之源,佢其實只係交易工具。人心裡的貪婪,怨恨,愚昧執著,才是煩惱罪惡的根源。是的,天命人皆有之,也就是命理學上的定數。而在佛家思想中,我認為就是業力和因果的關係。(首先,本人絕非佛學大師,不敢妄言論道,只是個人的一孔之見分享)今世你所看到的不公,或許在前數加前來一起看後,著實也是有其因果的。這說並非為所有無能為力或不義不公之事開脫,但畢竟現在所作,也是未來結果的前緣。做好現在的自己,就是為過去以至未來自己負上最好的責。

hket App已全面升級,TOPick為大家推出一系列親子、健康、娛樂、港聞及休閒生活資訊及Video。立即下載︰https://bit.ly/34FTtW9

TOPick推出「Band1學堂」,更多教育升學資訊︰https://bit.ly/3a6HT6T

文章獲羅比風水命理工作室授權轉載。

撰文 : 羅師兄 羅比居士