【維港音樂節】關心妍盼與囡囡齊演奏樂器 P1X3L首次戶外跳唱演出感謝粉絲支持

娛樂 11:19 2022/11/21

分享:

分享:

P1X3L感謝粉絲支持。

一連三晚「HKGNA樂在維港音樂節」在昨晚(11月20日)圓滿結束,首晚姜濤與韓國女高音曹秀美隔空交流外,曹秀美獻唱多首名曲為音樂節掀起序幕,關心妍、男團P1X3L接力演出,成音樂節焦點。

關心妍(Jade)與管弦樂團合作唱出多首名曲,她笑言「餓足3年」盼唱戶外騷,終夢想成真:「因為疫情都冇咩機會唱戶外騷,呢晚難得同管弦樂團一齊表演,所以揀歌都有啲私心嘅,今次音樂節會轉播去韓國,所以唱韓國改編歌《失戀哲理》,當地人聽唔明都會有回憶嘛,另外仲揀咗唱張學友嘅《愛是永恆》,因為演奏出嚟好有氣勢,我全程都望住囡囡唱,見佢揮晒螢光棒,應該都好投入。」

Jade更透露囡囡正學習樂器,希望未來可齊表演:「因為佢學緊單簧管,唔知佢練唔練得切,下次演唱會就可以唔洗打筋斗一齊Jam歌。其實都想去美加做巡迴演唱會,可以順便探吓親友,不過囡囡太痴身啦,唯有放假先一齊飛,所以海外做騷都只可以學校長假先可以舉行。」

關心妍

跳舞嚇到腳軟

至於男團P1X3L就話表演好興奮,成員葉振弘(Marco)坦言想不到有那麼多粉絲到場支持:「表演時間好似好快過咁,估唔到咁多Fans!平時我地都只係喺電視台嘅廠跳呢啲舞,難得跳戶外騷見到Fans咁熱情,我地都越跳越興奮。其實我上台前係嚇到腳軟,好在隊員都叫我食啲嘢先上台,所以今晚表演都好好!」

另一成員吳啟洋(Phoebus)稱食飽才上台,毫無偶像包袱:「 因為我地要一早著晒衫等演出,啲體力消耗得好快,唔食真係冇力表演。今晚唱完真係好興奮,好想搞一個自己嘅音樂會,希望下年可以搞到,但係我怕唔夠歌撐個騷。」

而成員歐鎮灝(George)很識做,做完訪問即刻出去氹Fans,坦言終感覺到「男團」身份:「因為我地第一次整隊衫,終於覺得自己係男團,所以即使忙拍節目、劇集,都想以音樂行先、想做騷!呢晚音樂節韓國直播,但我唔敢講衝出亞洲,因為依家目標係衝出九龍灣,去到麥花臣嘅程度先。」 

P1X3L

最新影片推介:郭柏妍專訪

精彩獎賞活動等您發掘:https://bit.ly/3ClEy1R

撰文 : TOPick柴犬出動