【新手爸爸】恨追多個隨時生一隊足球隊 鄭俊弘不追捧名校寄語仔仔做個好人

育兒資訊 19:24 2022/11/23

分享:

分享:

現年39歲的鄭俊弘(Fred)與同是歌手的何雁詩於2020年結婚,婚後好快造人成功,於今年的6月1日誕下仔仔Asher Douglas Cheng,如今仔仔已經半歲大,近照最近才曝光,眼仔睩睩非常可愛,盡得爸媽的真傳!Fred有份主演的《法證先鋒V》最近推出,他接受TOPick記者專訪時,坦言現在工作完都會即刻返屋企湊仔,而自從做了爸爸後,工作比以前更有動力及拚搏,更暢談作為新手爸爸的心情,他又寄語仔仔「一定要做個好人。」

Fred大談榮升爸爸的感受。

仔仔已經半歲大,受了半年訓練的Fred直言餵奶、掃風、換片已是專業級,如果10分滿分,他自評有9分:

我跟太太之前都要10分鐘才搞得掂,現在就很順手。現在都不用掃風,飲完奶,跟他坐一陣,就會自自然然落隔。初初就要掃多啲,聽人講有小朋友要掃風掃成45分鐘,夜晚係冇得瞓。

Fred講出仔仔「食玩瞓時間表」時倒背如流,證明這位新手爸爸對仔仔真的瞭如指掌!

  • 8:30am 起身餵奶玩兩個鐘再瞓
  • 10:30am 小睡
  • 12:00nn 食奶
  • 02:00pm 玩樂時間
  • 9:30pm 食完奶睡覺

Fred指仔仔已經成功戒夜奶,現在跟太太何雁詩訓練仔仔日頭不要睡太多,最多每個循環睡一小時,夜晚餵完最後一餐就睡覺,希望可以一覺瞓天光。他又大爆仔仔食奶多動靜:

食到咁上下就唔想食,沖就沖150ml俾佢,差唔多去到130ml就扭計,要俾佢休息一下,氹一氹,又伸條脷出來,又擰頭。

問到會否覺得自己會成為怪獸家長?Fred笑著說:「唔會,我覺得!但是我同太太好癡戀仔仔,經常性睇佢嘅片,或者唔係屋企又睇住部cam,睇佢瞓成點,或者rewind timeline,看看他幾點起身,希望relax一點,唔會做怪獸家長。」

一般BB到了6個月大就開始嘗試固體食物,稱為加固,好爸爸Fred已經做定功課,已物色二合一的電器去為仔仔加固,「有個機可以蒸,蒸完之後就可以攪爛。」不過仔仔還沒長出牙仔,「之前都有給他蘋果蓉試下,但好似未知食嘢概念。但覺得佢牙痕,成日咬手指。」

與太太有共識追多個

提到做了爸爸後有什麼轉變?Fred表示:「更定性,工作更拼命,為了仔仔乜都肯做,性格都寬容,連脾氣都好咗,仔仔不單止令到自己跟太太好開心,係令到成家人都好開心,成家都團結,見面機會多咗,成家都好開心。」仔仔似足家庭的開心果,幾時再追多個?
Fred說:「跟太太都有共識,不過就未有時間表,現在先專心照顧仔仔,等太太ready先、休息夠先。」

點擊圖片放大
+6
+5

生幾多先夠數?Fred說:「最少生多一個。」會不會想生隊足球隊?他說:「有可能㗎,真係唔知呀,因為真係好開心,冇foresee(預見)到真係咁開心,未生時好擔憂,擔心佢身體唔健康會點,有冇先天性疾病,如果我又提供唔到最好嘅嘢,又會點?憂慮多咗,反而佢一出生,開心程度蓋過晒憂慮。」

選校最緊要近

香港家長都很擔心教育問題,而從小在加拿大長大及受教育的Fred,會不會都想仔仔長大後返加拿大讀書,Fred聽罷就直言不想與仔仔分開,害怕親子關係因此而生疏,

如果我喺香港要工作,就希望大家都留在香港,因為我讀書的時候,很多同學,爸爸就在香港工作,媽咪就在加拿大,所以同學跟爸媽的關係生疏。

港爸港媽追捧傳統名校,但Fred就擔心仔仔如果讀名校會太大壓力,而且他跟太太中文都不太好,所以都希望仔仔在輕鬆的環境下成長,傾向讀國際學校,Fred笑言在住所對面已經有一間國際學校,返學好近,行過去就得,他不想仔仔長途跋涉:

最緊要近,不需要名校,開心環境成長,不要太大壓力。

不過Fred仍然希望仔仔能夠學好中文,最少要識寫、識講:

留意到好多小朋友都唔識講廣東話,就算在香港出世跟讀書,好似我家姐兩個小朋友,都是全部都是英文,所以太太及公公婆婆都跟佢講中文,將來讀書讀英文,起碼屋企講中文,一定要識。

問到有否為半歲大仔仔報學前班及playgroup,Fred表示太太現在開始有留意相關資訊,不過方向都以玩為主,或一些音樂活動,志在給仔仔與其他BB玩,識吓朋友。

點擊圖片放大
+7
+6

對仔仔期望:做個好人

對於太太何雁詩有仔萬事足,會不會不想「復出」做藝人?Fred就指太太仍然是一個很好的歌手,仍然會接工作、keep住去做音樂,不過就不會太拚命。

問到想不想太太做全職媽媽照顧小朋友,男主外女主內?Fred尊重太太的決定:

最重要佢開心,不要給自己太大壓力,因為仔仔出世後,希望佢都會keep住出去見朋友,唔好只係屈係屋企湊仔。

成為爸爸的Fred比以前定性不少,除了工作,所有放假時間盡量都帶仔仔出去走走,見花花草草,早前更一齊去迪士尼玩:「太太生日就去迪士尼staycation,仔仔又好好,冇扭計,瞓得好好,睇騷又唔驚,好大聲都唔驚,係酒店又瞓得好好。」

第一次做爸爸,感受很多,也會幻想將來仔仔長大的模樣,問到對於仔仔有什麼期望,Fred正經地說,「做一個好人,幫到人就幫,不需要做到些什麼,最重要是開心,簡簡單單踏踏實實,其實簡單就是福,記住阿仔!」

hket App儲積分換獎賞︰https://bit.ly/3ClEy1R

【名師試題教室】睇片連工作紙 中英數必學單元︰https://bit.ly/3sEeM3Q

hket App已全面升級,TOPick為大家推出一系列親子、健康、娛樂、港聞及休閒生活資訊及Video。立即下載︰https://bit.ly/34FTtW9

TOPick推出「Band1學堂」,更多教育升學資訊︰https://bit.ly/3a6HT6T

記者:陳麗薇

場地提供:天恩陪月