【星二代】兒子唔揸筆寫字嗌伊健「長毛飛」  黎諾懿教仔:容許佢有點壞

育兒經 11:56 2022/12/01

分享:

分享:

黎諾懿有一套「反社會人格」的育兒方針,會從兩個仔的性格出發。

現今香港不少父母都會強迫子女學十八般武藝,為搏加分入名校。擁有兩子的黎諾懿卻形容自己的育兒方針是「反社會人格」,即會按兒子性格讓他們探索、碰釘,父子更會以老表相稱,5歲大仔黎峰睿精靈可愛,遺傳了爸爸對廚藝的細胞,小小年紀已學會用刀切東西,更在爸爸的教導下,初嘗品酒。

最新影片推介:

黎諾懿自嘲是「反社會人格」,鍾意做反社會的事,他覺得男仔要撞板才會成長,不能過於保護,始終兒子將來要照顧一個家庭。

如果成日保護佢嘅話,佢會乜嘢都問:『爸爸,點?』所以我由得佢,帶佢去到自己啲餐廳,會俾佢嘗試好多嘢,等佢自己探索、磨鍊,去碰吓釘⋯⋯

諾懿自言不是育兒專家,不肯定自己教育方法是對或錯,只知道自己的育兒方式適合峰峰發展,他認為最重要看性格及因材施教,

佢個性格坐唔定,只可以喺側邊講故仔,讀幾多本都得,若要佢坐定定睇書一定冇可能。

在人人都擁有十八般武藝的年代,他卻坦言不會強制兒子參加興趣班,更慨嘆香港教育的失敗,

爸爸會喺社會上做好多嘢幫佢加分,學嘢唔係為加分,我哋香港教育某程度係失敗,好多小朋友功課多到不得了,如果老闆每日塞好多嘢俾你做,你都唔知做緊乜,可能佢哋認字上會好叻,但係咪需要呢?

    點擊圖片放大
    +8
    +7

5歲的峰峰,在家中不需要揸筆寫字,諾懿指不會強迫,也不會擔心兒子將來學習中文會吃力。

屋企有個讀書唔叻嘅爸爸,淨係識講中文,所以峰峰中文好流利,寫字由佢啦!google咪得囉!我仔google好叻,我自己都係咁,我自問揸起筆嘅時間,只係簽支票同銀碼。

不强迫兒子揸筆寫字,諾懿發現兒子記憶力不錯,學中文字快,他直言對兒子只有一個要求,就是學多種語言,

峰峰由細到大都睇到佢嘅聰明度,我哋教佢中文字,每一次嘅新字讀5次,佢就記到。我唔係好想佢喺學業上嘥太多時間,阿仔讀全日制,個時間表已經好full,學Minecraft、roblox、鋼琴、游水,仲有日文,日文係因為峰峰嘅舅母係日本人,由細到大都希望佢學多種語言,因為男仔係需要語言,唔好好似我咁樣。

上一代同下一代所學的東西已經大大改變,有些死背入腦,但最後用不著,

我哋以前要背物理元素表,數學一大堆公式,我想問大家出到嚟做嘢有冇試過開方吖?我覺得讀書最重要係訓練思維,分辨對與錯。

諾懿與太太有共識,為兒子揀選了沒有功課及考試的一條龍的國際學校,學校的選址更鄰近屋企,

好好彩,我大仔比較精靈,interview時,中英文對答都ok,同埋我仔唔怕羞,所以就順利插班,大仔入咗,細仔都可以好舒服咁一齊讀。

性格愛好似足爸爸

諾懿和太太李潔瑩(Nicole)不做怪獸家長,甚至容許兒子做一些壞事,包括讓兒子提早嘗試飲酒。

阿仔大少少我會俾佢嘗試飲酒,你唔俾佢接觸,大個唔知發生咩事,我細個都冇人教我飲酒,我都係鍾意飲酒,我都食過煙,後來因為健康問題戒咗,好多嘢係要試,細佬都係諗住咁教。

峰峰是迷你版黎諾懿,性格似足爸爸,小小年紀已經識品酒,

真係性格,我姪仔都覺得啲酒好臭,唯獨是我個仔,佢試過係好酒會話好嘢嚟!我仔好得意,你俾啲唔好嘅紅酒佢飲,佢會話『爸爸,no no!』saka、茅台都會沾吓口。

峰峰對品酒有sense,諾懿打算在這方面培育兒子,始終世界不停改變,尤其兒子長大後,只有人腦的創意和技術性的行業不會被科技取代。

好多嘢都俾機器取代,但技術性嘅,好似廚師就好難俾機器取替到,機器只係一個formal去做單一嘅味道,複雜性、先後次序都係人為,品酒師咁值錢係因為條脷,佢可以分得出咩餸配咩酒,電腦缺乏人性化,做唔到。

兒子用刀好叻

峰峰自小已被諾懿訓練成古惑仔,父子會以老表相稱,

我仔有一次彈琴,咪俾老婆鬧,老師叫峰峰表演,阿仔就話:『等等先,老表!彈幾多首先,講定喎,彈幾多首好喎!』我老婆揸住條片返嚟話:『你睇吓,你教呢啲!』我承認係我教,但我覺得好得意,個老師又唔係投訴嘅,我哋都教咗喺老師面前唔可以老表前、老表後,叫返老師,偶然係唔被社會接納,我都會解釋俾佢聽點解。

諾懿與太太結婚多年從不吵架,但會因兒子做「衰嘢」而被老婆鬧,要求他教好個仔。

我仔見到伊健,叫佢做『長毛飛』,伊健又OK喎!小朋友咁先得意,但好多家長係唔得,我覺得要有禮貌,但有陣時頑皮是需要有的,唔可能成日俾佢坐度又唔俾佢做呢樣嗰樣,例如;出去食飯,搗亂梗係唔得啦!但佢好偶然一啲好得意嘅對白,我又覺得OK喎!

峰峰和爸爸一樣,喜歡烹飪,閒時會在家煮食,切東西在所難免,因此諾懿不時都會被其他家長上網批評,著他小心,免生意外,

你點保護佢都有意外發生,我都係半個廚師,都估到有冇危險,好多家長覺得我俾刀個仔玩,擔心會𠝹親,咁係咪成世唔俾刀佢玩吖?點解唔從小話俾佢聽刀係危險,我仔切嘢真係叻仔㗎!我教佢切嘢要收埋啲手指仔,我教佢邊種刀係鋒利,會切損,我又教佢埋到火要點做呀?你唔夠高大唔好企櫈仔,你一反就會跌,我知道網上嘅朋友好關心我,但我有生之年,我睇到嘅話,希望保護咗佢哋,等佢哋試唔同嘅嘢先。

讓孩子真正服你

因年代不同,小朋友不可以體罰,諾懿從來沒有打過兒子,他覺得最重要是令孩子真正服你,

 

 

我細個打大,你問我驚唔驚?唔驚,痛囉!喺冇方法情況下,要佢驚一陣係得嘅,但佢哋唔會服你,加上科技網絡嘅年代,佢哋上網睇YouTube,識嘅嘢仲多過我哋,所以冇得打,打嚟做乜吖!打完咪上差館,我深信真係會報警,年代唔同,要講道理要令佢尊重你、服你!呢個作為父母一個好重要嘅課題!

諾懿續指,別人常說青春期反叛,其實只是逼得太緊,始終都係人嚟㗎嘛!

同你講多兩次都係唔得咪唔講,久而久之咪反叛,並唔係因為青春期反叛,只係用嘅方法唔啱。

廿四孝爸爸黎諾懿,是嘴刁兒子的大廚,每天7點起床為兒子炮製獨一無二的愛心飯盒,天天不同款,既要注意營養,又要注意食物不易變壞,以免兒子肚屙,就連他也自嘲是「煮飯公」。會否再追多個女,黎諾懿表示

係人都知我想追個女,但係天意嘅嘢唔俾我就收手,兩個好夠喇!第三個就真係唔會,小朋友係需要教!

    點擊圖片放大
    +11
    +10

hket App儲積分換獎賞︰https://bit.ly/3ClEy1R

【名師試題教室】睇片連工作紙 中英數必學單元︰https://bit.ly/3sEeM3Q

hket App已全面升級,TOPick為大家推出一系列親子、健康、娛樂、港聞及休閒生活資訊及Video。立即下載︰https://bit.ly/34FTtW9

TOPick推出「Band1學堂」,更多教育升學資訊︰https://bit.ly/3a6HT6T

記者︰林碧洋

場地提供:Glasshouse Greenery